Odil Ahmedov: “Hisobni ochib olsak, ishimiz engillashadi”

SHu kunlarda terma jamoamiz to'liq tarkibda mashg'ulotlarda ishtirok etyapti. Biz kechagi mashg'ulotdan so'ng terma jamoa sardori Odil Ahmedovdan intervyu oldik. Takidlash joiz, Ahmedov, Denisov va Rashidov terma jamoa yig'iniga aynan seshanba kunidan qo'shilishdi.

- Odil, Filippinga qarshi kechadigan o'yinga tayyorgarlik qanday davom etyapti?
- Har galgidek yuqori kayfiyatda tayyorgarlik ko'ryapmiz. Denisov bilan birga kecha Moskvadan uchib keldik. Yakshanba kuni premer-liga doirasida o'zaro o'yinimiz bor edi. SHu uchrashuvni o'tkazib, Toshkentga birga qaytdik. Hammaning kayfiyati alo darajada. O'ylaymanki, oldimizda turgan ikki uchrashuvda g'alaba qozonib, muxlislarni xushnud qilamiz. Oldimizga mana shu o'yinlarda olti ochkoni qo'lga kiritish vazifasi qo'yilgan.

- Safardagi har ikki o'yinda Bahrayn hamda Filippinni yirik hisobda mag'lub etdinglar. Nima deb o'ylaysiz, bu holat futbolchilarimizning biroz hotirjamlikka berilishiga sabab bo'lmaydimi?
- Aslo yo'q. Bu futbol, unda har qanday natija qayd etilishi mumkin. So'nggi paytlarda kutilmagan natijalarga ko'p bor guvoh bo'lyapmiz. O'zi aslida uyda o'ynashdan ko'ra safarda o'ynash osonroq kechadi. Mehmon jamoa birinchi galda etiborini himoyaga qaratadi. Bunday holatda himoya qo'rg'onini yorib o'tish qiyin bo'ladi. Menimcha, Filippin bilan o'yinda yopiq futbol bo'ladi. Bir so'z bilan aytganda, bizni qiyin o'yin kutib turibdi. Hisobni imkon qadar tezroq ochib olsak, ishimiz ancha engillashadi.

Kamoliddin Alimov suhbatlashdi