"Qo'qon-1912" jamoasi ham yozgi transferlar oynasida bir nechta futbolchilarni o'z safiga qo'shib olishni maqsad qilgani tayin. Eshitishimizga qaraganda klub "Paxtakor" futbolchilari Asadbek Sobirjonov va Javohir Siddiqovga qiziqish bildirgan. Bu qay darajada haqiqatga yaqin? Bu borada jamoa bosh murabbiyi Baxtiyor Ashurmatovga yuzlandik.
"Hozircha transferlarda faol emasmiz. Jamoamizdan Otabek Haydarov, Suhrob Nurulloev, SHodiyor Hojimatovlar ketishdi. "Neftchi"dan ijaraga olingan Hojimatov birinchi davrada kam o'yin amaliyotiga ega bo'lgani uchun jamoasiga qaytdi. Birinchi davrani "Andijon"da o'tkazgan Islom Abdullaev jamoamizga qaytdi. Lekin, "Andijon" klubi ikkinchi davrada posbonimizni yana ijaraga olmoqchi. Bu erda iqtidorli darvozabonni xohish va istagiga qaraymiz. Islom jamoamizda qolsa darvozabonlar orasida raqobat kuchayadi. Kim kuchliroq bo'lsa, o'sha asosiy tarkibdan o'rin oladi.
To'g'ri, transferlar vaqtida jamoamizga taklif qilishni istagan futbolchilarimiz bor. Lekin, katta transferlar qilmaymiz va jamoamizdagi yigitlarga ishonishda davom etamiz. Har bir o'yinda g'alaba uchun maydonga chiqamiz, turnir jadvalida yaxshi o'rinlarni olish uchun oxirigacha kurash olib boramiz",- deydi Baxtiyor Ashurmatov.
Bosh sahifaga
409