Eldor SHomurodov: "Kamchilik qolgan raqibning himoyasini yorib o'tish qiyin bo'ldi"
/ Kiritdi: BestMaster O'qilgan: 1154
O'zbekiston terma jamoasi futbolchisi Eldor SHomurodov Filippinga qarshi bo'lib o'tgan o'yindan so'ng (1:0) o'z fikrlari bilan o'rtoqlashdi.
"Og'ir o'yin bo'ldi. SHunga qaramay, kichik hisobda bo'lsada g'alabaga erishdik. Muhimi, o'zimizga kerakli uch ochkoga ega bo'ldik. Bundan xursandmiz", - deya o'z fikrlarini boshladi SHomurodov.
- Filippin terma jamoasidan mana shunday qarshilikni kutganmidinglar?
- Ha, raqibdan mana shunday qarshilik kutgandik. Ular o'z maydonidagi o'yinda ham juda yaxshi harakat qilishgandi. Filippin rivojlanayotgan terma jamoalardan hisoblanadi. SHu sababli, o'yin oson bo'lmasligini bilardik.
- O'yinning boshida raqib bir kishi kam bo'lib qolishi jamoamizning bo'shashishiga sabab bo'lgandek ko'rindi...
- Yo'q. Ular 10 kishi qolganidan so'ng o'z darvozasi dahlsizligini saqlab qolishga urinishdi. Agar to'liq tarkibga qarshi o'ynaganimizda raqib hujumga ham o'tardi. Kamchilik qolgan filippinliklarning himoyasini yorib o'tish qiyin bo'ldi.
- Navbatdagi o'yin Bahrayn terma jamoasiga qarshi bo'ladi. Ushbu o'yin haqida, tayyorgarlik jarayonlari haqida nimalar deya olasiz?
- Bugungi o'yin natijasini unutgan holda keyingi hafta bo'ladigan o'yinga tayyorgarlikni boshlaymiz. Nasib qilsa, o'sha o'yinda ham g'alaba qozonib muxlislarni xursand qilmoqchimiz.
Aziz To'xtamurodov
Bosh sahifaga
185