15 avgust kuni saytimiz bosh muharriri Narzulla Saydullaev Jasur Jaloliddinovning transfer hujjati qidirilayotganini ommaga malum qilgan edi. Bugun esa PFL bosh direktori vazifasini bajaruvchi Diyor Imomxo'jaev tashkilot Jaloliddinov transferi bo'yicha ish ochishni so'rab O'FAga murojaat qilgani to'g'risida xabar qildi.
O'z-o'zidan bu xabarlar rus matbuotining ham diqqatini jalb etmay qolmadi. Vaziyatga oydinlik kiritish maqsadida "RIA Novosti" jurnalisti Sergey Fuks Jasurning agenti Yuriy Belousga murojaat qilgan.
"Bu transfer tarixi juda toza, hech qanday shubha-gumonga hojat yo'q. Bilishimcha, "Bunyodkor"da rahbariyatida bosh direktor almashgan. Transfer hujjatlarini ularning o'zlari izlayverishsin. Ular nimadir qilishi kerak bo'lsa, hujjatlarni "Lokomotiv"dan so'rashlari ham mumkin.
Jasur "Lokomotiv"ga erkin agent sifatida ko'chib o'tdi. Qaror qabul qilindi, uni erkin agent sifatida qo'yib yuborishdi. O'z navbatida, "Bunyodkor" Jasurni qo'yib yuborishi uchun olishni istayotgan mablag'ni ham ko'rsatdi. Bu summani futbolchining o'zi yoki uchinchi tomon ham to'lashi mumkin edi. "Bunyodkor" o'zi talab qilgan mablag'ni to'liq olgan. SHuningdek, qo'shimchasiga FIFA ustavi bo'yicha futbolchini tarbiyalagani uchun tovon puli ham oldi. Bu ham yaxshi summa. Toshkent klubida hech qanday etiroz yo'q. Pulni Rossiya premer-ligasining eng yaxshi klublaridan biri to'lagan. Jaloliddinovning ham kelajagi porloq", - dedi hamyurtimizning agenti Yuriy Belous jurnalistning savollariga javoban.
Malumot uchun, Jasur "Bunyodkor" tarkibida jami 32 uchrashuvda maydonga tushib, o'z nomiga 3 ta gol yozdirib qo'ygan. U yil boshida o'tkazilgan Belarus termasiga qarshi o'tkazilgan o'rtoqlik o'yinida O'zbekiston milliy terma jamoasi safidagi debyutini nishonlagan edi.
Bosh sahifaga
160
