Meksikadagi o'smirlar (U-17) o'rtasidagi jahon chempionatida terma jamoamiz tarkibida porlagan futbolchilardan biri bu Timur Hakimov edi. O'sha kichik mundialda bugungi kun qahramoni chinakamiga porlagandi. Meksikadan qaytib kelgan terma jamoamiz azolariga O'FA maydonida "Spark" avtomobillarining tantanali ravishda topshirilgani hamon ko'z o'ngimizda.
- Yoshligim barcha bolalar kabi oddiy o'tgan, - deydi Timur bolalik yillarini esga olib. - Ko'chada tengdoshlarim bilan o'ynardim. Etti yoshimdan futbol bilan hamnafasman. Ko'chada futbol o'ynab yurganimizda kattaroq bolalar uydagilarim yoniga kelib, meni futbolga berishlarini so'rashgan. Bu bolada qobiliyat bor deb aytishgandi. Birinchi murabbiyim Aleksey Evstafeev. Bu murabbiydan bir umrga minnatdorman.
Faoliyatimdagi eng yorqin turnir sifatida hech ikkilanishsiz Meksikadagi jahon chempionatini aytgan bo'lardim. Bu mening ilk jahon chempionatim edi. Dastlabki turdagi mag'lubiyatga qaramay chorak finalga qadar etib borgandik. Mundialdagi sharoitlar, muhit ajoyib edi. Meksikada xatto bizga mahalliy aholi ham chin dildan muxlislik qilgandi. Xuddi o'z maydonimizda o'ynagandek taassurot bo'lgandi.
Ha, haqiqatan ham Meksikadagi mundialni hali uzoq vaqt eslab yuramiz. Mayli, endi bu tarix. O'sha jahon chempionati qahramonlaridan biri Timur Hakimovni bugungi tavallud ayyomi bilan chin qalbdan muborakbod etamiz. Bu tabrikka saytimiz ijodkorlari va muxlislari ham qo'shiladilar. U joriy mavsum "Oq-tepa" klubi sharafini himoya qilyapti.
Bosh sahifaga
599