Alisher SHog'ulomov: "Ibrohim Tomivani "Bunyodkor"ga o'tishini istagan edim. Lekin..."

Ushbu uchrashuvdan so'ng "Oq-tepa" klubi raisi Alisher SHog'ulomov fikrlari bilan o'rtoqlashdi.

"Ko'rib turganilardek qiziqarli o'yin bo'ldi. Hujumkor o'yin ko'rsatishga harakat qildik. Bugun jamoamizda olti nafar yangi futbolchi maydonga tushdi. Yana shuncha futbolchilarimizni Superliganing klublariga o'tkazdik. Transferlar vaqtida kelib qo'shilgan yangi futbolchilarimiz to'liq yuz foiz kirishib ketdi deya olmayman. Keyingi bahslarda bundan ham chiroyli o'yin ko'rsatishga harakat qildik.

Ha, ikkinchi bo'limda ochiq o'yin bo'ldi. Jamoamizda o'zimizning akademiyamizdan chiqqan uch nafar 2004 yilda tug'ilgan yosh futbolchilar debyutini nishonladi. Bu biz uchun ikki barobar katta bayram. Ularning debyuti yaxshi o'tdi. Yosh futbolchilarni barchasidan qoniqdim, berilgan vazifa va ko'rsatmalarni to'liq bajarishdi. Jamoamiz chiroyli o'yin ko'rsatdi, pas o'ynadik, vaziyatlardan unumli foydalandik.

Oraliqdagi katta tanaffus faqat biz uchun bo'lmadi. Buni bahona qilish ham noto'g'ri bo'ladi. Hamma jamoalar o'ynavotiku. Vazifamizni bajardik, yaxshi tayyorgarlik ko'rdik. Navbatdagi turda "Dinamo" bilan to'qnash kelamiz. Mazkur o'yinga munosib hozirlik ko'ramiz.

Ibrohim Tomiva masalasiga oydinlik kiritib o'tsam. To'g'risini aytsam o'zim Tomivani "Bunyodkor"da to'p tepishini istagan edim. Lekin, moliyaviy tomonlama klub Tomivani o'zi bilan kelisha olmadi. SHu sababdan u "Qizilqum" jamoasiga o'tdi. Ibrohimni "Oq-tepa"da olib qolsam ham bo'lardi. Uni ijaraga berganmiz. Biroq, futbolchilar oldinga intilishlarini, o'sishlarini xohlayman. Superligada o'ynasa futbolchining o'zi uchun ham foyda bo'ladi. Tomivani kelajagi porloq, keyingi mavsumda uni yanada kattaroq jamoalarda ko'rish nasib qilsin"- deydi SHog'ulomov.