Muhammadqosim To'xtasinov: “Alijon Marajabov o'zidan yaxshi nom qoldirib ketdi”

Fursatdan foydalanib o'z vaqtida marhum hakam Alijon Marajabov bilan birgalikda bir guruhda o'yinlarni boshqarib borgan Muhammadqosim To'xtasinov bilan suhbatlashib, Alijon akani esladik. O'tganlar haqida gapirish doimo og'ir bo'lgani kabi, To'xtasinov ham Alijon aka xususida kuyunib, chuquz iztirobda so'zlab berdi.

- Hozirgi Andijon davlat universiteti stadionida ilgari shahar birinchiligi o'yinlari o'tkazilardi. Marhum ukamiz Alijon Marajabovning hakamlikdagi dastlabki qadamlari mazkur uchrashuvlarda tashlangan desam mubolag'a bo'lmaydi. O'sha paytda shahar birinchi liga jamoalari to'rt guruhdan iborat bo'lardi. Alijon ham “XBK” nomli jamoasi bilan turnirda ishtirok etgan. O'sha vaqtda nimadir bo'lib, hakam etishmovchiligi bo'lganida, Alijonni qo'liga xushtakni tutqazib, o'yinni boshqarishi kerakligini aytgandim. Birinchi bo'limni o'tkazib olgach, tanaffus paytida “Bo'ldi bas. Boshqa hakamlik qilmayman” deb turib olgandi. SHunda men qarorimda qatiy turib, “Kechirasiz, o'yinni oxirigacha tugatib qo'yasiz” dedim. (Biroz o'ylanib) Bu 1988 yillarga to'g'ri keladi. SHundan so'ng endilikda doimiy ravishda hakamlikda birga faoliyat yuritamiz deya, etaklaganmiz. O'zida ham keyinchalik qiziqishi ortib bordi. 

Vaqti kelib respublika toifasidagi hakamga aylandi. Oliy ligada bosh hakam sifatida o'yinni boshqargan paytlari bo'ldi. Sobiq ittifoq paytida ikkinchi liga 7-zona deya atalardi. O'sha vaqtda o'yinlarni boshqarish uchun Andijon viloyatidan 12 nafar hakam bor edi. To'rtta guruh demakdir. Toshkentdan 18 nafar bo'lsa, bizdan 12ta! Bu borada O'zbekistonda ikkinchi o'rinda turardik. Namanganliklar vaqti kelib bitta hakamlar guruhini tashkil qila olmasdi. Bizdan keyin farg'onalikliklar turardi. Andijonlik hakamlar bir-birini har tomonlama qo'llab-quvvatlardi. Qaerga bormaylik, bir-birimizni etaklab borardik. Ko'rganlar xavas qilardi. Hozirgacha shu omil saqlanib qolgan. Haftaning har dushanba kunida yig'ilib turamiz. Marhum ukamiz Alijon ham biz bilan so'nggi vaqtlariga qadar birga bo'ldi. Xatto operaciyadan so'ng yig'inimizga kelib, yurdi. Masofadan bo'lsa ham doimiy ravishda xabarlashib turardik. Beshavqat o'lim qadrdonimizni olib ketdi. Ilohim oxiratlari obod bo'lsin. Alijon o'zidan yaxshi nom qoldirib ketdi deya olamiz. 

Islombek Rustambekov.