Video  Alisher SHog'ulomov: "Purishkindan ko'ra yoshlarga imkoniyat berishni maqul ko'rdik"

"Uchrashuvni ko'rib o'zlaring guvoh bo'ldinglar, og'ir o'yin o'tkazdik. To'g'risi maydon chimida ozgina muammolar bor ekan. Stadion maysasi bir oz o'sib ketgan. Bilasizmi, Samarqandga borganimizda ham stadion maysasi shunaqa edi. Eshitishim bo'yicha,  “Istiqlol” jamoasida maydon borasida muammo bor ekan. Bugungi o'yinda omad biz tomonda bo'ldi. "Istiqlol" jamoasi bir necha bor imkoniyatlardan foydalana olmadi.

Ko'rib turganingizdek, har bir uchrashuvda yoshlarga imkoniyat berishga harakat qilmoqdamiz. Masalan, "Xorazm"ga qarshi bo'lib o'tgan o'yinda ham 4-5 nafar yoshlar klubimizda ilk o'yinini o'tkazishdi. Yaqinda klubimizga Ispaniyadan mutaxassis kelib qo'shiladi. O'ylaymanki, ushbu mutaxassis klubimiz ravnaqi yo'lida o'z hissasini qo'sha oladi.

Pavel Purishkinni nega tarkibga qo'shib olmadik? Bilasizmi, Purishkin O'zbekistonga qaytib kelganida uning jismoniy imkoniyati yaxshi emas edi. Biz uni tiklanishidan ko'ra yoshlarga imkon berish lozim deb topdik" - deydi Alisher SHog'ulomov.

Bekzod Tolibov yozib oldi