SHuningdek davralar oralig'ida jamoaga afrika qitasidan Samuel Opex hamda Villyam Mikandalar qo'shib olindi. Malumot o'rnida aytib o'tish joizki, “Oq-tepa” klubi tashkil topganiga bu yil roppa-rosa 20 yil bo'ldi.
SHu munosabat bilan bugun klub bazasida Serxio Marinangeli va yangi futbolchilar jurnalistlarga tanishtirildi. Muloqot tarzida o'tgan matbuot anjumanida jurnalistlar o'zlarini qiziqtirgan savollar bilan murabbiy va futbolchilarga yuzlanishdi.
“Hurmatli jurnalistlar matbuot anjumaniga xush kelibsiz. Sizlarni yig'ishimizdan asosiy maqsad jamoamizga yaqinda kelgan ispaniyalik murabbiyni tanishtirish hamda sizlarni qiziqtirgan savollarga javob berish. Bilasiz, bu yil klubimiz o'zining 20 yilligini nishonlamoqda. Biz o'z harakatlarimiz bilan muxlislarni xursand qilish va futbolimiz rivojiga hissa qo'shishni maqsad qilganmiz”,- deydi klub prezidenti Sarvar SHog'ulomov.
- Legioner tanlovida nima uchun aynan Afrika qitasidan o'yinchilar olinmoqda?
(Alisher SHog'ulomov “Oq-tepa” rahbari) – Nima uchun aynan Afrika qitasidan legioner olyapmiz, aynan afrikalik futbolchilar bilan ishlaymiz degani emas. Bizning loyihamiz bor, bu Ibrohim Tomiva bilan boshlandi. U o'zidan yaxshi taassurot qoldirdi. Etibor berayotgan bo'lsangiz bu yil O'zbekistonda Superligada ham afrikalik futbolchilar ko'pchilikni tashkil qilmoqda. Bizga farqi yo'q. Serbiya yoki Polshadan, Ukrainadan - bunisi ahamiyatsiz. Yaxshi o'yin namoyish etsa bo'lgani, o'zidan yaxshi taassurot qoldirayotgani uchun ular ishlashda davom etmoqdamiz. Ispaniyalik murabbiy orqali o'zbek futboliga yangilik kiritmoqchimiz. Marinangeli orqali nafaqat klubimizni, balki o'zbek futboli darajasini ham ko'tarishni maqsad qilganmiz. Biz murabbiy bilan aloqaga chiqqanimizda qarashlarimiz va fikrlarimiz bir-biriga mos tushdi. Qisqa va uzun paslar, to'pni nazorat qilish, kombinaciyalar kabi uslublarimiz ham o'xshash. SHu tomondan ham kelisha oldik va maqsadimizga erishdik.
- Moliyaviy tomonlari haqida nima deya olasiz?
(Alisher SHog'ulomov “Oq-tepa” rahbari) – U O'zbekistonga pul uchun kelmadi. Marinangeli O'zbekiston haqida ko'p narsa bilmas ekan, qiziqib qoldi. O'zbek futbolini rivojlantirish va darajasini ko'tarish uchun uni taklif qilganmiz. Ko'plab futbolchilarni terma jamoalarimizga etkazib berishni maqsad qilgan.
(Serxio Marinangeli, murabbiy) – “Oq-tepa” futbol klubidan taklif kelib tushganda uni o'rganib chiqdim. Meni o'ylantirayotgan savol oilam masalasi edi. CHunki, oilamni Ispaniyada tashlab, o'zim uchun begona bo'lgan mamlakatga keldim. Bu bir tomondan sizni ruhlantiradi. Boshqa tomondan siz oilangiz haqida ham ko'proq o'ylashingizga to'g'ri keladi. Klub rahbarlari bilan gaplshganimdan keyin fikrlarimiz bir joydan chiqdi. Oldimizga qo'ygan maqsadlarda ham o'xshashlik bor. SHuning uchun menga qaror qabul qilish oson bo'ldi. Ispaniyada oilamni tashlab keldim, bu borada klub rahbarlariga ham aytganman. Lekin, bu erga kelib men yangi oilaga ega bo'ldim. Alisher SHog'ulomov, G'anisher SHog'ulomovlar menga shu qadar imkoniyatlar berishdiki, o'zimda chetdan bo'layotgan qo'llab-quvvatlashni his qildim. Hozir ham o'z uyimdagidekman.
- Xorijlik yoki evropalik murabbiy, futbolchilarni O'zbekiston chempionatiga faqat katta maosh evaziga jalb qilish mumkin. CHunki, o'zbek futbolining obro'si va nufuzi Evropada mashhur emas. “Oq-tepa” jamoasi sizni nimasi bilan o'ziga jalb qildi?
(Serxio Marinangeli, murabbiy) – Men futbolni juda yaxshi ko'raman. Evropani boshqa mamlakatlarida ishlash oson. O'zbekiston men uchun faoliyatimdagi yangi chaqiriq. Agar boradigan bo'lsam ham inson, ham proffessional sifatida o'sishga erishishim mumkin. Yuqorida aytganimdek klubning maqsadlari, men proffessional inson sifatida oldimga qo'ygan maqsadlarimga o'xshash. Klubning maqsadi Superligaga chiqish, men esa bu borada yordamimni beraman. Kelishimdan maqsad katta maosh yoki pul emas. Muzokaralar olib borilayotgan paytda jamoaning o'yinlarini ko'rdim va kuzatdim. To'g'risini aytsam jamoa bunaqa o'ynaydi deb o'ylamagan edim. Jamoaning namoyish etayotgan o'yini juda ham yoqdi. Yig'ilgan futbolchilar men va murabbiylar berayotgan ko'rsatmalarga to'g'ri keladi. SHu narsa meni xursand qildi. Qabul qilgan qarorimga afsuslanmadim.
(Samuel Opex, himoyachi) – Avvalambor murabbiylarga, klub prezidentiga katta rahmat aytmoqchiman. Futbolchilar meni yaxshi qabul qilishdi. Men bu erga kelsam ayrim muammolarga duch kelaman deb o'ylagan edim. Lekin, o'zimni uyimdagidek his qilmoqdaman. Yaqinda Toshkent shahrini aylandim. Toshkent bunchalik chiroyli ekanligini bilmagan edim. Ikkinchidan meni bu erga kelishimda yordam bergan insonlarga minnatdorchilik bildiraman. Nigeriyalik mashhur futbolchi Piter Odemvinge bu erga kelayotganimda yaxshi tavsiyalar va maslahatlar berdi. O'zbekistonda o'sishga erishishim mumkinligini aytgandi.
- Ispaniyalik murabbiy bilan qancha muddatga shartnoma imzolandi? Taxminan qaysi lavozimda ish boshladi?
(Alisher SHog'ulomov “Oq-tepa” klubi rahbari) – Murabbiy bilan hozircha og'zaki kelishuvga erishganmiz. Bu yil fikrlarimiz bir-biriga to'g'ri kelsa, keyingi mavsumda ham birga ishlashni maqsad qilganmiz. Qishda jismoniy tayyorgarlik bo'yicha yana bir murabbiy kelishi kerak edi. Malum sabablarga ko'ra kela olmadi. Lekin, u jamoamizga albatta keladi. Serxio Marinangeli bilan mashg'ulotlarni maslahatlashgan holatda kelishib olib boramiz. Yakuniy qarorni men qabul qilaman. PFLdan murabbiy sifatida endi ro'yxatdan o'tkazamiz.
- Evropalik murabbiylardan odatda biz ko'p narsa kutishga, yangilik ko'rishga odatlanganmiz. Siz jamoaga qanday yangilik olib kirishni maqsad qilgansiz?
(Serxio Marinangeli, murabbiy) – Biz uchun eng muhimi - mashg'ulotlar jarayonini yanada yaxshilash. Umuman olganda jamoaning mashg'ulotlari yomon emas. Biroq, men o'zimning g'oyalarimni, boshqa murabbiylar o'z g'oyalarini qo'shib umumlashtiramiz. Jamoa o'ynayotgan futbolni o'zgartirmoqchi emasmiz. Biz shuni yanada rivojlantirmoqchimiz. Aytaylik, qisqa paslar, maydondagi uchburchaklarni yasash, maydonning kichkina qismida tezlikka urg'u qaratishni o'rgatyapmiz. Ispaniya metodikasidan ozgina narsalarni olib kiramiz. Lekin, butkul uslubni o'zgartirmaymiz. Bizning asosiy maqsadimiz mashg'ulotda qanday kuch bilan harakat qilsak, o'yinda ham huddi shunday harakat qilish. Ertalabki mashg'ulotlarni ko'rgan bo'lsangiz ko'p ham intensivlikka etibor qilmadik. Kechki mashg'ulotlarda ko'proq to'p bilan ishlashga, jismoniy kuchga urg'u beramiz. Biz murabbiylar shtabi orqali jamoaning o'z uslubini yaratishimiz kerak.
- Jamoa mashg'ulotlarni suniy qoplamali maydonda olib bormoqda. O'yin esa tabiiy chimli maydonda o'tmoqda. Bu futbolchilarga qay darajada tasir qiladi?
(Alisher SHog'ulomov "Oq-tepa" klubi rahbari) - O'yinlarni ham o'zimizning maydonda o'tkazgan bo'lar edik. Lekin, biz raqiblarni ham o'yladik. Uchrashuvdan oldingi mashg'ulotlar tabiiy maydonda olib boriladi. O'ynashni bilgan odam erda ham o'ynab yutib ketishi mumkin. Jamoamizning natijalari haqida to'xtaladigan bo'lsam, pandemiya hamma jamoalarga o'z tasirini o'tkazdi. “Bunyodkor”, “Andijon”, “Buxoro” kabi Superliga klublari ham qiyin ahvolda. SHu sababli mavsum boshidagi yig'ilgan futbolchilarni aksariyatini qo'yib yuborishga majbur bo'ldik. Hozirda vaziyat yaxshi tomonga o'zgargan. Umid qilamanki, keyingi mavsumda ketgan futbolchilarimizni ortga qaytaramiz. Bu bilan bahona qilmoqchi emasman. Rejalarimizdan boshqa xorijlik futbolchilarni taklif qilish o'rin olgan. Keyingi mavsumda argentinalik futbolchini olib kelmoqchimiz. Balki, Messi bo'lishi ham mumkin.
(Serxio Marinangeli, murabbiy) – “Shampionat.asia” saytida men haqimda chiqqan maqolani ko'plab do'stlarimga yubordim. Buni argentinalik, ispaniyalik futbolchilar, murabbiylar do'stlarim ko'rishdi. Ular mendan O'zbekiston haqida ko'p narsalar so'rashdi. SHuni aytmoqchimanki, O'zbekiston juda chiroyli mamlakat. Odamlariga umuman gap bo'lishi mumkin emas. Futbolchilar va murabbiylar o'rtasidagi ajoyib munosabat, bir-biriga bo'lgan hurmat meni juda hayron qoldirdi. Men faoliyat olib borgan joylarda bunday emas edi. “Oq-tepa” orqali biz to'p tepayotgan chempionatning darajasini ko'tarsak xursand bo'lardim.
Abdulaziz Iskandarov yozib oldi.
Bosh sahifaga
443