Piter Xyuistra: "Bizdan oldingi o'yinda qo'pollik hech kimga ko'rinmagandi, lekin bizga kelganda darrov VARni eslab qolishdi"

O'yindan keyingi matbuot anjumanida "Paxtakor" murabbiyi Piter Xyuistra ishtirok etib qo'yidagi fikrlarni bildirdi. 

- O'yinni yaxshi boshladik. Hammasi biz kutgandek ketayotgandi, biroq kutilmaganda futbolchimiz qizil kartochka olib rejalarimiz o'zgarib ketdi. Bir kishi kam bo'lib qolishimizga qaramay oxirigacha kurashdik va buning uchun yigitlarga rahmat aytaman. O'ylaymanki, Osiyo chempionlar ligasida o'zimizni ko'rsata oldik. Afsus, chorak finalda musobaqa bilan xayrlashyapmiz, lekin bu jamoa kelajakda ko'p narsaga qodir deya olaman.

- Qizil kartochka ko'rsatilgan vaziyat bo'yicha fikringiz? 

- Men o'sha vaziyatni to'liq ko'ra olmadim. Lekin VAR yordamida hakam qaror chiqarib "sariq"ni "qizil"ga o'zgartirdi va futbolchimizni chetlatdi. Faqat shuni aytishim mumkin, xolos.

- O'yindan so'ng Masharipov bilan gaplashdingizmi? 

- U juda xafa. Nihoyatda tushkun kayfiyatda va jamoaga yordam bera olmaganidan xafa. Albatta, Masharipov chetlatilishini hech kim kutmagandi. Lekin men bir jihatga etiboringizni qaratmoqchiman, bizdan oldin shu stadionda "Al Nassr" - "Al Ahli" uchrashuvi o'tkazildi va unda ham VAR ko'rib chiqsa bo'ladigan qo'pollik kuzatildi. Lekin negadir hech kim miq etmadi. Ammo bizning futbolchimiz shunday qo'pollik qilganida darhol o'yinni to'xtatib VARga murojaat qilishdi. Natijada VARdan foydalanish bizda ikki xil taassurot uyg'otdi. Yani, bu texnologiya kimga qanaqa ekandek tuyulyapti. 

- Ikkinchi taymda Hojimat Erkinov maydonga tushib jamoaga ancha yordam berdi. Uni oldinroq tushirish imkoni bormidi? Va uning o'yiniga qanday baho berasiz? 

- Biz Hojimatni anchadan beri bilamiz. Uni bekorga ijaradan qaytarib olmadik. Biz bu futbolchiga ishonamiz. Ikkinchi taymda uni maydonga tushirdik va o'zidan kutilgan o'yinni namoyish etdi.