Bugun O'zbekiston milliy terma jamoasi azosi va "Navbahor" klubi yarim himoyachisi Aziz Turg'unboev o'z tug'ilgan kunini nishonlamoqda. Futbolchi bugun 26 yoshga to'ldi.
Yodingizda bo'lsa, "Navbahor" futbolchisi qishki transfer oynasi paytida bir vaqtning o'zida ikki klub - "Navbahor" va "Paxtakor" bilan shartnoma imzolagani aniqlangan, buning natijasida O'FA Turg'unboevni 6 oy muddatga futboldan diskvalifikaciya qilgandi. 2019 yilning 9 iyul sanasiga qadar futbolga aloqador barcha turdagi faoliyatdan chetda bo'lgan bugungi qahramonimiz yana katta futbolga qaytdiyu, lekin baribir yarim yillik futbolsiz hayot uning o'yiniga o'z tasirini o'tkazmay qolmadi. Ikki klubning xatosi tufayli ikki yil oldin mavsum kashfiyotiga aylangan futbolchining faoliyati izdan chiqdi.
Mayli, bo'lar ish bo'lib o'tdi. Muhimi, bu kabi g'alati ishlar endi boshqa futbolchilarimiz bilan takrorlanmasin. Aziz Turg'unboev bu mavsum bo'lmasa, keyingilarida albatta yana o'z so'zini aytadi. Yarim himoyachi yana avvalgidek gollar ura boshlaydi, jamoasini g'alabalar sari etaklaydi.
Tashqi ko'rinishidan Ronalduga o'xshab ketadigan Turg'unboev aynan Krishtianuga muxlislik qiladi. Lekin chapaqay bo'lgani uchunmi, harakatlari, jarima zarbalaridan kiritayotgan gollari portugaliyalik yulduzdan ko'ra Lionel Messiga o'xshaydi. Uning keyingi faoliyati ham dunyo futboli yulduzlarinikidek bo'lib qolsin. Biz "Navbahor" klubi tarbiyalanuvchisiga nomlari tilga olingan futbolchilarning yo'lini tilaymiz va bugungi tavallud ayyom muborak bo'lsin, deya niyat bildiramiz. Bu tilaklarga "Navbahor" jamoasining ko'p ming sonli fidoiy muxlislari ham qo'shilishadi degan umiddamiz.
Darvoqe, bugun "Navbahor" Superliganing 18-turini safarda "Buxoro" klubiga qarshi o'tkazadi. Azizbekka o'z tug'ilgan kunida darvozani ishg'ol qilib, jamoasiga g'alabani tortiq etish nasib qilsin. Har qanday holatda ham raqib darvozasi ishg'ol qilinsa, u albatta Turg'unboevga bag'ishlanadi va nishonlanadi.
Bosh sahifaga
427