Doniyor Ismoilov: "Ikkinchi bo'limda o'yinimizni kuchaytirish hisobiga g'alaba qozondik"

Malumot o'rnida Doniyor Ismoilov mazkur bahsda jamoasining ikkinchi goliga mualliflik qildi.

"Qiyin o'yin bo'ldi. Ko'rdingiz, dastlabki 20 daqiqada himoyaga o'tirib qoldik. Ikkita goldan so'ng o'zimizga kelib oldik va hujumlar uyushtirishni boshladik. Birinchi bo'limda raqibning bosimiga tura olmadikmi yoki kuchimiz etmadimi bilmadim. Zaxiradan maydonga tushgan futbolchilar o'yinni kuchaytirishdi deb o'ylayman.

Murabbiyimiz kiyinish xonasida o'z maslahatlarini va ko'rsatmalarini berdilar. Qo'rqmasdan oldinga o'tishimizni, raqibdan kam joyimiz yo'qligini va bizga ishonishlarini aytdilar. Boshqa narsalarga etibor bermasdan o'zimizning o'yinni o'ynadik va g'alaba qozondik.

O'yinning ohirgi daqiqalari yaqinlashgan sari tezkorlikni kuchaytirdik. Bosim va hujumlarni oshirdik. Birinchi bo'limda to'pni oldinga tepib yuborib ko'p xatolar qildik. Oldinga tepib yuborishining foydasi yo'q. Pas bilan harakat qilgan maqsadga muvofiq. Tanaffusdan keyin murabbiylarimizni ko'rsatmalarini bajarishga, ular istagan o'yinni ko'rsatishga harakat qildik.

"Oq-tepa" ham pas o'ynaydi. Uzun va qisqa paslar orqali hujum tashkil qiladi. Balki, ular charchab qolishgandir. Birinchi bo'limda ular g'alabaga munosib o'yin ko'rsatishdi. Biz esa ikkinchi bo'limda o'yinimizni kuchaytirish hisobiga g'alaba qozondik",- deydi Doniyor Ismoilov.