O'yin davomida juda ko'plab vaziyatlar yaratgan "temiryo'lchilar" ortga mag'lubiyat bilan qaytishga majbur bo'lishdi. "Sug'diyona"ning mahoratli posboni Milan Mitrovich jamoasini muqarrar gollardan qutqarib qoldi. SHuningdek kiper saytimiz tomonidan 18-turning eng yaxshi darvozaboni deb topildi. Biz bu borada Mitrovichning fikrlari bilan qiziqdik.
- "Sug'diyona" kecha o'z maydonida "Lokomotiv"ni mag'lubiyatga uchratdi. Raqib o'ziga yarasha kuchli edi. Umuman joriy mavsumda jamoa poytaxt jamoalariga etarlicha qarshilik ko'rsatmoqda. Avvalo kechagi o'yin haqida fikrlaringiz va taassurotlaringiz bilan o'rtoqlashsangiz...
- Kecha juda qiziqarli va kurashlarga boy o'yin bo'ldi. Birinchi bo'limda biz juda yaxshi o'yin namoyish etdik, ikkinchi bo'limda esa "Lokomotiv". Hisob 2:0 bo'lib turgan paytida o'yinni hotirjam yakunlashimiz kerak edi. "Loko" esa ikkinchi bo'limda bizga muammo tug'dira oldi. Ularda gol urish uchun bir qancha qulay imkoniyatlar yuzaga keldi. Lekin, biz bunga yo'l qo'ymadik. O'z maydonimizda katta g'alabani nishonlashni uddasidan chiqqanimizdan xursandman.
- Jamoa standart vaziyatlarda juda yaxshi harakat qildi va ikkita gol urdi. Bu raqibning imkoniyatlaridan kelib chiqib tanlangan uslubmi?
- "Lokomotiv" tajribali futbolchilarga ega, yaxshi shakllangan jamoa. Ikkinchi davrani yaxshi boshlashdi va uchta g'alaba, bitta durang qayd etishdi. Ularning kuchli va kuchsiz tomonlarini bilar edik. Bahs ohiriga qadar ishonchni yo'qotmaslikka harakat qildik.
- Joriy mavsum siz uchun O'zbekistondagi uchinchisi hisoblanadi. SHu vaqt oralig'ida o'z muxlislaringizga ega bo'ldingiz, jamoangiz tarkibida ajoyib o'yinlar o'tkazmoqdasiz...
- O'zbekistonga 2018 yil iyun oyida kelgan edim. "Sug'diyona"ning shunchalik jonkuyar muxlislari borki, bemalol bizning 12-o'yinchimiz bo'la oladi. Ikki yildan oshiq vaqtdan beri "Sug'diyona" sharafini himoya qilib kelmoqdaman. Bu borada menda jamoaga va muxlislarga nisbatan etirozim yo'q. Ular meni har doim qo'llab-quvvatlab kelgan. Yomon o'ynagan paytlarimda ham ruhan dalda berishgan. Faqat meni emas butun jamoani. Muxlislarsiz futbol o'z jozibasini yo'qotadi, muxlislar futbolga o'ziga hos atmasfera beradi. Kecha ham ishqibozlar jamoamizni 90 daqiqa davomida tinmasdan qo'llab-quvvatlab turishdi. G'alabani ularga bag'ishlaymiz.
- O'tgan mavsumda jamoa sovrinli o'rinlar uchun kurash olib borgandi. Bu mavsumdagi barqarorsizlikni sababi nimada?
- Avvalgi mavsumga o'xshamaydigan ko'plab omillar mavjud. Koronavirus ko'p narsalarni o'zgartirib yubordi. CHempionat bahslari ikki marotaba to'xtatildi. Ayrim futbolchilar kasallika chalindi va bir nechta uchrashuvlarda bizga yordam bera olishmadi. Birinchi tanaffusdan so'ng "Paxtakor", "Lokomotiv" kabi jamoalarni mag'lubiyatga uchratdik. Hammasi yaxshi ketayotgan edi. So'ng ohirgi to'rtta tur Toshkentda o'tkazildi. O'z maydoningizda o'ynasangiz baribir boshqacha bo'ladi. Markazlashgan chempionatda ham ochkolarni ishlashga harakat qildik va turnir jadvalida o'rta pog'onaga ko'tarilib oldik. Endilikda barini boshidan boshlayapmiz. Mavsum yakuniga qadar ko'proq ochko ishlashimiz talab etiladi. Yakunda turnir jadvalida qaysi o'rinni olishimizni vaqt ko'rsatadi.
- "Sug'diyona" poytaxt jamoalaridan ochko olishni uddasidan chiqmoqda. Birinchi davrada amaldagi chempion "Paxtakor" mag'lub etildi, safarda "Lokomotiv". Buning siri nimada?
- Hech qanday siri yo'q. Kiyinish xonasida murabbiy bizga ulkan ishonch bildirayotganini takidladi. Uchrashuvga yaxshi tayyorgarlik ko'rdik va borimizni shu o'yinga berdik. Bu juda yoqimli edi. CHunki, biz 20 yildan so'ng "Paxtakor"ni yutdik. "Paxtakor" OCHLda chorak finalga qadar etib bordi va qitaning to'rt jamoasidan biri bo'ldi. Bor gap shu.
Abdulaziz Iskandarov yozib oldi.
Bosh sahifaga
568