Bunda eronlik futzalchilar 2:1 hisobida g'alaba qozonishdi. O'yindan keyin Dilshod Rahmatov o'z fikrlarini bildirib o'tdi.
"Eron bilan 2016 yil finalda va keyingi Osiyo chempionatida o'ynagandik. Bugun tengma-teng harakat qildik. Ko'rinib turibdi ularning tarkibida ham o'zgarishlar bor. Fikrimcha, Eronda ham pandemiya sababli to'xtalishlar, o'yinlar kam bo'lgani tasir qilgan. Bizda ham shunday. Bugun yomon harakat qilmadik, o'zimizning xatolarimiz evaziga gol o'tkazib yubordik. Xatolar ustida ishlaymiz. Bu o'yin bizga Osiyo chempionatiga tayyorgarlik vazifasini o'taydi.
Eron nafaqat Osiyoda, Jahonda ham kuchli uchlikdan joy oladi. Osiyo chempionati orqali Jahon chempionatiga yo'llanma olishni maqsad qilganmiz. Terma jamoamizning tarkibida yoshlar ko'p. Jarohat olganlar ham bor. Anasxon Rahmatov, Rustam Umarov biz uchun katta yo'qotish hisoblanadi. SHunga qaramasdan ularning o'rnini bosadigan o'yinchilar bor. Terma jamoani optimal formaga kirishi o'zimizga bog'liq. Osiyo chempionatigacha bo'lgan ikki oy biz uchun etarli bo'ladi deb o'ylayman",- deydi Dilshod Rahmatov.
Bosh sahifaga
418