Akbar Ismatullaev: "Bizni oson bo'lmagan o'yin kutmoqda"

"Paxtakor" CHempionlar ligasida 15 martda o'ynagach, Buxorodagi bellashuvgacha rasmiy o'yinda ishtirok etmadi. Tayyorgarlik jarayoni xususida Akbarning fikri quyidagicha bo'ldi.

- Jamoa bilan shu muddatda navbatdagi uchrashuvlarga yaxshi tayyorlanishga intildik. Oldinda bir qator muhim o'yinlar kutmoqda. Rasmiy bahslar etishmovchiligini mashg'ulotlarda jiddiy ter to'kish orqali meyorga keltirishga urindik. Terma jamoa tarkibiga bir necha futbolchilar chaqirildi, lekin "Buxoro" bilan o'yinga tayyormiz.

Raqib safida 2016 yilgi mavsum oldidan kuzatilgan o'zgarishlar to'g'risida yarim himoyachi shunday takiladi.

"Raqibimiz tarkibini o'tgan yilgiga nisbatan ancha kuchaytirdi. Yaxshi saviyadagi o'yinchilar jalb etildi. Ularning "Obod" bilan Toshkentdagi bellashuvini tomosha qildim. "Buxoro" jamoaviy o'yinni shakllantirishga urinmoqda. Jamoaga taklif etilgan futbolchilar foyda keltirishga harakat qilishyapti. Bizni keskin va oson bo'lmagan to'qnashuv kutmoqda".

O'tgan yili Buxoroda kechgan uchrashuvda Ismatullaevning to'p oshirishidan keyin CHipev o'z darvozasini ishg'ol qilgan va Akbar deyarli gol muallifiga aylangandi. Bu unga o'yin arafasida qo'shimcha ishtiyoq beradimi?

- O'tgan yilgi bellashuvni yaxshi eslayman. O'shanda jarima to'pini tepganimdan keyin mezbonlar vakili o'z darvozasini ishg'ol qilgandi. Bu safar ham jamoamga shunday foyda keltirishga urinaman. Avvalgi muvaffaqiyat qo'shimcha ishtiyoq beradi. Nasib qilsa, bu gal ham g'alaba qozonishga intilamiz.