"Avvalambor, assalomu aleykum. O'yinni stadiondan kuzatdinglar, juda ham qiyin bo'ldi. "SHo'rtan" jamoasining kuchli tomonlarini bilgandik, shunga yarasha tayyorgarlik ko'rdik. Yigitlarga alohida minnatdorchilik bildiraman, qo'llaridan kelganicha harakat qilishdi. 6-7 nafar asosiy o'yinchilarimiz ketib qoldi. Lekin, jamoada qolgan futbolchilar ham ulardan kam emas. Kim o'zining darajasida o'ynasa, biz Pro ligadagi barcha jamoalarga qarshilik ko'rsata olamiz. SHu gapni men bir necha kun oldin futbolchilarga tushuntirdim. Allohga shukur, o'zimizga kerakli bo'lgan natijani qo'lga kiritdik. Bu o'yin tarixga aylandi. Endilikda navbatdagi o'yinlarga tayyorgarlikni davom ettiramiz",- deydi Anvar Berdiev.
- Futbolchi o'ziga javob beradi, murabbiy esa butun jamoaga. SHu bois, murabbiylik faoliyatingiz qanday o'tmoqda?
- Barcha futbolchilikni tugatgan murabbiylar shu gapni aytishardi. Hozir shuni boshimdan o'tkazib his qilib turibman, maydon chetida turish juda qiyin. To'g'ri, futbolchi bo'lsangiz bir o'zingizga javob berasiz, murabbiy esa butun jamoadagilarga javob beradi. Oson ishning o'zi yo'q, murabbiylik va futbolchilikning o'ziga yarasha qiyin tomonlari bor. Maydonni chetida turib boshqarish haqiqatdan ham qiyin ekan. Bu narsani endi tushunyapman.
- Tarkibga yangi jalb etilgan futbolchilarda o'yin amaliyoti kam edi. Ammo, ularni ruhlantira olyapsiz. Bunga qanday erishyapsiz?
- Men o'zim jalb qilgan futbolchilarning imkoniyatini yaxshi bilaman. Ular futbol o'ynab yurgan futbolchilar. To'g'ri ayrimlarida o'yin amaliyoti yo'q edi. Lekin, futbolchilarga takidladim, to'p tepib yurgan futbolchi birdaniga o'ynolmay qolishi mumkin emas. Futbolchi maydonda necha daqiqa harakat qilsa ham jonini berib o'ynashi kerak.
- Oldinda bundan ham qiyin o'yinlar kutmoqda. Jamoadagi va zaxiradagi futbolchilarning jismoniy tayyorgarligidan ko'nglingiz to'lyaptimi?
- To'g'risini aytaman, bizda jismoniy tayyorgarlik bo'yicha vaqt yo'q edi. Jamoada qolgan futbolchilarning jismoniy tayyorgarligi yomon emas. Yangi kelib qo'shilgan futbolchilar mashg'ulotda alohida dastur asosida shug'ullanishmoqda. O'ylaymanki, bu futbolchilar ham o'yindan-o'yinga kuchayib borishadi. Firdavs Asadov ikki kun oldin kelib qo'shildi. U o'z darajasiga chiqib olsa jamoamizga bo'lajak o'yinlarda yordam beradi. Viloyat hokimimizga va klubimiz rahbarlariga alohida rahmat aytmoqchiman. Ular bizni qo'llab-quvvatlashmoqda. Mana hozir ham jamoamiz rahbarlari futbolchilarning oldiga kirib minnatdorchilik bildirishdi. Bu futbolchilarimizga qo'shimcha kuch bag'ishlaydi. SHu qatori menga ham. Menga ishonch bildirishayotgan ekan ohirigacha kurashamiz. Bilgan narsalarimni futbolchilarga o'rgatib, ularning maydonda bor kuchi bilan o'ynashlarini ko'rishni istayman. Yana qaytaraman, jamoamizni tiklab, etibor berganliklari uchun viloyat hokimimizga minnatdorchilik bildirib qolaman. "Istiqlol" stadionini qaytarib berishgani va shu erda o'yinlarimizni o'tkazayotganimiz uchun ham rahmat aytaman.
Bosh sahifaga
272