Botir Qoraev: "Ketma-ket beshta mag'lubiyatdan keyin murabbiylar shtabida o'zgarish? Buni rahbariyat hal qiladi"

"AGMK juda tajribali jamoa, bejizga ikkinchi o'rinda ketmayapti. Bugungi bahs og'ir bo'lishini bilgandik. Birinchi o'tkazib yuborgan golimiz bizga qattiq tasir qildi deb o'ylayman. Himoyachimizning xatosidan keyin gol o'tkazdik. Bizda ham vaziyatlar bo'ldi, ammo foydalana olmadik. Ikkinchi gol o'tkazilgan vaziyatda darvozabonimizga qarshi qo'pol o'ynalgandek tuyuldi. Hozir chetdan turib gapirish noto'g'ri deb o'ylayman, takroriy vaziyatni ko'rib chiqish kerak", - deydi Qoraev. 

- "Mashal" ketma-ket beshinchi mag'lubiyatni qabul qilib oldi...
- Albatta, ketma-ket beshta o'yinda yutqazish qiyin. Jamoamiz malum tanaffusdan keyin Superligaga qaytdi. Tarkibimizda yosh futbolchilar juda ko'p. Har bir bahsda g'alabaga intilayapmiz. "Qizilqum" bilan bahsda ham 4-5ta imkoniyatlar bo'ldi, "Surxon" bilan bahsda ham kamida 7ta vaziyat bo'lgandi, "Nasaf"ga qarshi bahsda tan olish kerak o'yinimiz yaxshi chiqmadi, bugun ham futbolchilarimiz yomon harakat qilishmadi. Ammo bugungi mag'lubiyatni unutib, "Qo'qon-1912" bilan bahsga tayyorgarlik ko'ramiz.

- Beshta mag'lubiyatdan keyin murabbiylar shtabida o'zgarish bo'ladi deb o'ylaysizmi?
- Buni klub rahbariyati hal qiladi. Biz o'z ustimizda ishlayapmiz. Agar jamoada o'yin yo'q bo'lsa boshqa gap edi. Uyda "Bunyodkor"ga qarshi 90 daqiqa davomida 10 kishi bo'lib tengma-teng o'ynagandik. "Surxon" bilan ham ajoyib harakat qilgandik. Jamoamiz potenciali yuqori. G'alaba va mag'lubiyat doim yonma-yon yuradi.

- Bugungi natijaga hakamlar qanchalik tasir o'tkazdi deb o'ylaysiz?
- O'yin vaqtida ehtiros bilan ularga etiroz bildirishimiz tabiiy hol. Istalgan murabbiyda bunday holat bo'ladi. Ammo hakamlarni muhokama qilishga bizning haqqimiz yo'q.

- Zaxiradan tushgan futbolchilar o'yinni kuchaytira oldimi?
- Mo'min Meliev biroz yaxshi o'ynadi. Bizda eng katta muammolardan biri zaxiradan tushganlar o'yinimizni kuchaytira olishmayapti. O'tgan o'yinlarda ham shunday vaziyat bo'ldi. Bu borada ishlayapmiz. "Qo'qon-1912" bilan o'yinda muxlislarni xursand qilishga harakat qilamiz.

- Bugungi matbuot anjumanida Dilver Vaniev qatnashmaganiga nima sabab bo'ldi? Mag'lubiyatdan keyin kayfiyati yo'qmi?
- Dilyaver Vaniev betobligi bois matbuot anjumanida qatnasha olmadi. Nasib qilsa keyingi o'yindan keyin Vanievning o'zi matbuot anjumanida ishtirok etadi.