Temurxo'ja Abduxoliqov: "To'purar bo'lishni istayman, ammo birinchi navbatda jamoamning yutug'i muhim"

- Uchrashuv birinchi golga qadar qiyin bo'ldi. Gol urib olganimizdan so'ng raqib oldinga o'tishni boshladi va tabiiyki biz uchun raqib jarima maydonchasi oldida bo'sh hududlar paydo bo'ldi. Agarda birinchi bo'limda gol urmaganimizda bizga yanada qiyin bo'lardi deb o'ylayman. Jamoamiz uchun bu bahs juda yaxshi ruhda kechdi va OCHL doirasidagi "Sepaxon"ga qarshi bellashuv oldidan bu g'alaba biz uchun ayni muddao bo'ldi. Bu o'yin "Sepaxon" bilan bo'ladigan jiddiy uchrashuv oldidan o'ziga xos tayyorgarlik vazifasini o'tab berdi. CHiroyli g'alaba taqdim etgan xush kayfiyat bizga kelgusi o'yinda juda qo'l kelishi mumkin. To'g'ri, jamoamiz chiroyli o'ynadi va yirik hisobda g'alaba qozondi. Ammo o'yin kamchiliklarsiz bo'lmaydi. Har bitta uchrashuvda baribir o'ziga yarasha xatolar va kamchiliklar kuzatiladi. Biz bular ustida ish olib boramiz. O'ylashimcha, ikkinchi goldan so'ng jamoamiz biroz o'yinni raqibga topshirib qo'ygandek bo'ldi. Xotirjamlik natijasida biroz bo'shashdik. Endi "Sepaxon" bilan bo'ladigan bahsda jiddiy tayyorgarlik ko'ramiz. To'purarlik? Har mavsum oldidan hujumchi to'purar bo'lishni o'z oldiga maqsad qilib qo'yadi. Jumladan men ham. Ko'p narsa esa omadga bog'liq. Bazi paytlarda gol urishda omad ochiqchasiga yuz ugirishi mumkin. Balki aksincha, oson bo'lmagan vaziyatda gol urishni uddalaysan. Men bu mavsumda yaxshi niyat qilmoqdaman va to'purar bo'lishga harakat qilaman. Nafaqat to'purarlik, balki jamoaviy yutuq men uchun muhim ahamiyat kasb etadi. Muhimi jamoamiz chempionlikni qo'lga kiritsa etardi.