Bugun Qashqadaryo futboli, xususan "Nasaf" professional klubiga sadoqatli ham futbolchi, ham murabbiy, O'zbekiston Respublikasida xizmat ko'rsatgan sport ustozi Ro'ziqul Berdiev 49 yoshga to'ldi.
Ro'ziqul Sadullaevichni bugungi unutilmas sana munosabati bilan saytimiz ijodkorlari va o'quvchilari, u kishini tanigan, bilgan barcha insonlar hamda "Nasaf" klubi muxlislari nomidan muborakbod etamiz.
Ro'ziqul Berdiev 1997 yildan beri "Nasaf" bilan birga. 2008 yilda professional futbolchilik faoliyatini yakunlab, murabbiylar shtabiga qo'shildi. "Nasaf" safida 314 ta o'yinda maydonga tushgan futbolchi uzoq yillar jamoaga sardorlik ham qilgan.
Ro'ziqul Berdiev "Nasaf" klubi bosh murabbiyi sifatida chempionatimizda 4 ta bronza va 1 ta kumush medalni qo'lga kiritdi. Bir martadan O'zbekiston Kubogi va Superkubogida ham zafar quchdi. To'rt marta O'zbekiston Kubogi finalchisi bo'ldi. Uch marta O'zbekistonning eng yaxshi murabbiyi deb topildi. "Nasaf" bosh murabbiyi sifatida 5 bor Osiyo CHempionlar ligasida ishtirok etdi.
Ro'ziqul Berdievdan iqror va iqtibos
- To'g'risini aytaman, murabbiy sifatida o'zimga ko'pincha tanqidiy munosabatda bo'laman. Kamchiliklarimni bilsam, buni juda qattiq qabul qilaman. Meni birinchi tanqidchim - o'zim. Futbolda, murabbiyda kamchilik bo'ladi. Qachonki siz o'zizni tanqid qilmasangiz, kamchiliklaringizni bilmasangiz, unda o'sishdan to'xtab qolasiz. Ideal murabbiy bo'lmaydi. Barchani kamchiligi bo'ladi. Muhimi, inson o'sha kamchiligi haqida bilishi, buni to'g'rilash o'stida ishlashi lozim.
Agarda men o'zimni ideal murabbiy deb bilsam, kamchiliklarim yo'q deb o'ylasam, unda futboldan ketishim kerak. Men hali futbolda kimman? Hali o'rganadigan, uzlashtiradigan jihatlarim juda ko'p. Murabbiy, umuman inson doimo izlanishda bo'lishi kerak.
Men bilgan narsa balki jamoamiz yoki O'zbekiston chempionati darajasida bo'lishi mumkin. SHunisi aniqki, men bilmagan narsalar juda ko'p futbolda. Bu borada esa izlanish, mehnat qilish kerak.
Azizjon Nurov, "Qizilqum" matbuot kotibi
"Ro'ziqul Sadullaevichni ustozim, akamdek bilaman. O'z vaqtida "Nasaf" klubida bir necha yil birga ishlaganmiz. Bu inson haqida ko'p va xo'p gapirish mumkin. O'ta samimiy, oilaparvar, birovning ko'ngliga tegadigan gaplarni aytmaydigan, bir so'z bilan aytganda Hazrati Inson! Oilamiz azolari va o'z nomimdan Ro'ziqul akani bugungi tavallud kunlari bilan muborakbod etaman. Farzandlari rohatini ko'rsinlar, "Nasaf"ni yangi g'alabalar sari etaklasinlar! Yosh istedodlarni tarbiyalash, kashf qilishdan charchmasinlar!".
O'z o'rnida biz ham fursatdan foydalanib, yana bir bor Ro'ziqul aka Berdievni bugungi tavallud ayyomi bilan samimiy tabriklaymiz. Ro'ziqul Sadullaevichga sihat-salomatlik, uzoq umr va baxt-saodat tilaymiz. Oila azolari hamda barcha futbol muxlislari baxtiga doimo bor bo'ling deb qolamiz.
Bosh sahifaga
432