Yozgi transferlar oynasida jamoaga kelib qo'shilgan mahoratli futbolchi Suhrob Nurulloev ushbu uchrashuvda zaxiradan maydonga tushdi va jamoasining o'yinini kuchaytirishga erishdi. Biz esa mazkur bahsdan so'ng Suhrob Nurulloevga bir nechta savollar bilan yuzlandik.
- “Turon” maydonida to'p tepish hech bir jamoaga oson emas. Raqibning kuchidan kelib chiqib aytadigan bo'lsak jamoalar bu erga ikki hissa kuch bilan kelishadi. SHunday bo'lsada, “Dinamo” og'ir kechgan uchrashuvda bir ochko olishni uddasidan chiqa oldi. Nima deb o'ylaysiz jamoa ikkinchi bo'limdagi o'yini hisobiga durang qayd etdimi yoki...
- Aslida kim bilan o'ynashimizdan qatiy nazar g'alaba uchun maydonga chiqamiz va murabbiyning ko'rsatmalarini to'liq bajarishga harakat qilamiz. “Turon” bilan o'yinda jamoamizga faqat g'alaba kerak edi. Buning uchun bizda etarlicha vaziyatlar ham yuzaga keldi. Afsuski, yakunda o'yin durang bilan tugadi.
- Mezbonlarning kuchli pressing va hujumiga qarshi qanday reja ishlab chiqilgan edi?
- “Dinamo”ning o'z o'yin uslubi bor. Mana shu uslubda to'p tepishga va raqibga qarshilik ko'rsatishga harakat qildik.
- Bir necha turdan beri kuzatib kelmoqdamiz, aksariyat uchrashuvlarda sizning jarima yoki standart vaziyatlardan uzatgan to'plaringiz xavfli tus olmoqda va samara keltirmoqda...
- Bizda bunday vaziyatlar har bir o'yinda bo'ladi. Mashg'ulotlarda standart vaziyatlardan foydalanish xususida ishlaymiz. Buni esa o'yinda amalga oshirishga harakat qilamiz.
- Ko'ryapmiz, “Dinamo” jamoasida yana avvalgi darajangizga qaytmoqdasiz. Bu jamoada oldingizga yana qanday maqsadlarni qo'ygansiz?
- To'g'risini aytsam, menda o'yin amaliyoti kamligi bois “Dinamo” safiga kelib qo'shildim. Avvalgi darajamga qaytishim lozim edi. Meni bu jamoaga Sergey Ivanovich Lushchan taklif qildi. Klubda ahil jamoa yig'ilgan desam mubolag'a bo'lmaydi. Superligaga chiqishimiz uchun bor kuchimiz bilan oxirigacha harakat qilamiz.
- Jamoa Sergey Lushchanning uslubiga to'liq moslashib ulgurdimi?
- Qaysidir manoda to'liq moslashib oldik deya olmayman. Yangi jamoa 2 oyda murabbiyning uslubiga ko'nikib ketishi qiyin. Bizga malum vaqt kerak bo'ladi. Lekin, hozirda jamoamiz uchun natija muhim hisoblanadi. O'yindan-o'yinga har tomonlama kuchayib boramiz.
- “Dinamo” kuchli to'rtlikdan o'rin olsa “Turon” “Neftchi” “SHo'rtan” kabi jamoalar bilan yana bir bor kuch sinashishiga to'g'ri keladi...
- Ha, kuchli to'rtlikda bu jamoalarga qarshi bahslar juda qiziqarli kechishi shubhasiz. Superligaga yo'llanmani qo'lga kiritishimiz uchun barcha jamoalarga qarshi o'ynay olishmiz zarur.
- O'z vaqtida Aleksandr Mochinov ustozligidagi O'zbekiston o'smirlar terma jamoasi sharafini himoya qilgansiz. Nima deb o'ylaysiz, so'nggi yillarda bu yoshdagi terma jamoamizning natijalarini pasayishiga nima sabab bo'lmoqda? O'shanda Mochinov jamoaning musobaqaga oz fursat qolganda qabul qilib olgandi va etarli darajada tayyorlay olmagan edi. SHunga qaramay guruh bosqichida hujumkor va chiroyli o'yin ko'rsatgansizlar...
- Bu yoshda murabbiyning tajribasi ko'proq kerak bo'ladi deb o'ylayman. To'g'ri, Aleksandr Mochinov bizga kech murabbiy bo'lgan. Qo'lidan kelgancha ko'p narsalarni o'rgatgan deya olaman. O'shanda Suriya bilan o'yinda bizning omadimiz kelmagandi.
- Tailanddagi Osiyo chempionati sizni muxlislarga tanitgan desak to'g'ri bo'ladimi? Quvayt va KXDR darvozasiga ajoyib gollarni urganingiz yodimizda...
- Ha, shunday desak ham bo'ladi.
Abdulaziz Iskandarov suhbatlashdi.
Bosh sahifaga
225