"Futbol odami" deya nomlangan mazkur hujjatli film "Favvora film" tomonidan suratga olingan.
Malum bo'lishicha hujjatli filmni suratga olish uchun 50 million so'mga yaqin pul sarflangan.
"Favvora film" studiyasi muassisi Keldiyor Xo'jayorovning aytishicha, Nuriddin Zayniev haqidagi hujjatli filmni suratga olish ishlari o'tgan yili yoz faslida boshlangan.
"Nuriddin Zayniev bilan birga ishlaganmiz. "Favvora film" studiyasini ochganimizdan so'ng futbol fidoyisi haqidagi hujjatli film suratga olish g'oyasi tug'ildi. Suratga olish jarayonlari o'tgan yili yoz faslida boshlangan edi. Bu yil yoz faslida tayyor bo'ldi. Biroq pandemiya sabab film namoyishi kechikib keldi", - deydi Keldiyor Xo'jayorov.
21 daqiqa davom etadigan hujjatli filmda "Nasaf" bilan OFK kubogini yutgan ukrainalik murabbiy Anatoliy Demyanenko ham Qashqadaryoning sobiq hokimi haqida xotiralarini aytib o'tgan. Intervyu Ukrainada tasvirga olingan.
"Nuriddin Zayniev "Nasaf" va "Mashal" futbol akademiyasini tashkil etishda jonbozlik ko'rsatganini bilaman. Futbolga juda qiziqar edi. Har safar o'yin oldidan ko'rishganimizda bugun qanday taktika tanlaysiz, qaysi tarkibni tushirasiz" deb so'rardi", - deydi filmda Demyanenko.
Eslatib o'tamiz, Nuriddin Zayniev 2002-2011 yillar oralig'ida Qashqadaryo viloyati hokimi bo'lib ishlagan. Nuriddin Zaynievich rahbarligi davrida 2011 yili Qarshining "Nasaf" klubi OFK kubogi sohibiga aylangan.
Bosh sahifaga
449