Ikki qayiqning boshini tutgan cho'kib ketadi

Muxlislar va mutaxassislar orasida Islom Qobilov, Lutfullo To'raev va Sanjar Qodirqulov muntazam ravishda maydonga tushirilayotgani borasida etirozlar ko'payib ketdi. Mamlakatimiz bosh jamoasi uchun o'ynayotgan, maydonda kurashayotgan mazkur futbolchilarga rahmat aytamiz. Savollar esa Abramovning manziliga yo'nalgan.

Odatda murabbiylar o'rtoqlik o'yinlaridan 2 xil maqsadda foydalanishadi:

1. Mavjud rezervning salohiyatini ko'rib olish, sinovdan o'tkazish;

2. Agar jamoaning qolipi yaratilgan bo'lsa, o'yin uslubi va chiziqlar o'rtasidagi bog'lamlarni shakllantirish.

Milliy jamoaning etakchi vakillari (Odil Ahmedov, Eldor SHomurodov, Otabek SHukurov, Ikrom Aliboev, Oston O'runov, Eldor Suyunov va boshqalar) bu yig'inda ishtirok etmaganini hisobga olsak, 2-variant o'z-o'zidan chiqitga chiqadi.

Demak, Vadim Abramov terma jamoaga nomzod o'yinchilarni, ularning imkoniyat darajasini (moliyaviy ahvoli emas, maydondagi salohiyati nazarda tutilmoqda) tekshirib olishga harakat qilgan. SHunday bo'lsa, savol tug'iladi: nahot Abramov mavsum davomida qo'l ostida o'ynab kelgan Islom Qobilov, Lutfullo To'raev va Sanjar Qodirqulovning potencialini hamon bilmaydi? Aks holda, yig'inga butunlay boshqa o'yinchilarni jalb qilgan bo'lar (masalan, Malayziya chempionatida ajoyib mavsum o'tkazgan Sanjar SHoahmedov), yoki Husniddin Aliqulovga ham o'ynash imkoniyatini berar edi...

Muxlislar orasida etirozlar ko'paygani haqida aytgandik. Emishki, Abramov "Bunyodkor" futbolchilarini terma jamoa safida o'ynatish orqali ularni xorij klublari uchun reklama qilayotgan bo'lishi mumkin ekan. Biz bunga qo'shilmaymiz, lekin haqli savol tug'iladi: nega terma jamoa rolida manfaatlarning ehtimoliy to'qnashuvi yuzaga kelishiga o'rin qoldirilgan? Balki, Abramov milliy jamoa yoki klubdan birini tanlaydigan vaqt kelgandir. Naql bor-ku: "Ikki qayiqning boshini tutgan oxirida cho'kadi". Bu haqda O'FA mutasaddilari bosh qotirgani maqul. Terma jamoani oldinda juda ham muhim uchrashuvlar kutib turibdi.

So'zimiz oxirida bir jihatga etiborimiz qaratmoqchimiz. Sanjar Qodirqulov hamda Islomjon Qobilov "SOCCER CAREER AGENCY" xizmatidan foydalanadi (bu agentlikning tasischilari haqida hech qanday malumot topolmadik). Har 2 futbolchining "Bunyodkor" bilan amaldagi shartnomasi joriy yilning 31 dekabrida yakuniga etadi va ularning legionerga aylanish ehtimoli yo'q emas. Bu bilan hech narsaga shama qilmoqchi emasmiz, shunchaki, fakt o'rnida qabul qilasiz. Omon bo'ling!

Faxriddin Ro'ziev, O'zJOKU talabasi