Bunga yaqqol misol "Surxon" - "Andijon" uchrashuvidagi Rahimbek Karimovning chiqargan qarorlari, o'yin natijasiga tasir qiladigan holatlarning yuz bergani va hokazo. Quyida shu haqida to'xtalamiz.
1. "Andijon" gol urgan vaziyat
65-daqiqada burchakdan Suxrob Berdiev uzatgan to'pini Ildar Mamatkazin boshi bilan darvozaga yo'lladi. Bosh hakam esa bu vaziyatda VAR qarorini tinglashga qaror qildi. Quyidagi suratga etibor bering. Birinchidan "Surxon" himoyachisining oyog'i chiziqdan o'tib turibdi. Bu vaziyatda hech qanday o'yindan tashqari holat qayd etilmaydi.
Demak, mazkur holatda "Andijon"ning toza goli hisobga olinmagan. 2ta rakursdan ham buni payqash qiyin emas. Ikkinchi etibor qilish kerak bo'lgan vaziyat, bu erda VAR chiziqni futbolchining tovoni orqasidan o'tkazgan. Fikrimcha, chiziq aynan futbolchining oyog'i turgan joydan chiziladi. Bu borada fikrim xato bo'lmasligi uchun, bir necha nafar hamkasblarimiz, tajribali mutaxassislar bilan ham muhokama qildim. Ular bilan ham deyarli fikrimiz bir joydan chiqdi.
2. VAR`ga sarflangan daqiqa
Hakam ikkinchi bo'limda Birgina shu vaziyatning o'ziga 7,5 daqiqa vaqt sarfladi. Rahimbek Karimov esa butun boshli ikkinchi taymga 9 daqiqa qo'shib berganiga guvoh bo'ldik. Ikki jamoa ham kamida 4 nafardan o'zgarishni amalga oshirdi. Endi hisoblab ko'ring, 7,5 daqiqani VAR`ning o'zi olib qo'ygan bo'lsa, futbolchilarni almashtirishga ham 4,5 daqiqa ketgan. Orada "jarohat"langan futbolchilarga yordam ko'rsatilgan. Xulosam, hakam qo'shib beriladigan daqiqalarni to'g'ri hisobga olmagan. Rostdan ham VAR`dagi vaziyatlarni tomosha qilish, o'tirib olib xotirjam o'zbek filmni ko'rish bilan bir xil bo'lib qolmoqda. Futbolchi gol urgach nishonlashni ham, nishonlamaslikni ham bilmayapti. Tezkor qaror qabul qilish mumkinku.
3. Rubin Xebayning chetlatilishi
Uchrashuv yakunlangach shaxsan o'zim Rubin bilan gaplashdim. Uning aytishicha, u jahl ustida alban tilida gapirgan. Bu hakamga qaratilmagan. Rahimbek Karimov, buni haqorat sifatida qabul qilib ikkinchi sariq va qizil kartochkani ko'rsatgan. Balki o'zbekistonlik hakamlar qo'shimcha til sifatida Albaniya, Serbiya, CHernogoriya davlatlari tillarini o'rganishayotgandir. Buyog'i bizga qorong'u. Uchrashuv yakunlangach ikki tomon o'rtasida aytishuv kechdi. Referi ingiliz tilini tushunishini, Rubin uni haqiqatdan ham haqoratlaganini aytdi. O'zbekiston futbol hakamlar markazidan o'sha vaziyatning audiosi va aslida nima bo'lgani haqidagi izohini kutib qolamiz.
Bu erda gap kimnidir oqlash, tarafkashlik emas. Yuqoridagi holat ertaga boshqa jamoa bilan takrorlanadi. Xatolar vaqtida taqdim etilmasa, qo'l qovushtirib o'tiraverilsa, yakunda kimningdir aybi bilan, kimdir chempion bo'lib ketishiga hech kim kafolat bermaydi.
Bosh sahifaga
407