Obod - Qizilqum: CHiptalar sotuvga chiqarildi

Mazkur o'yinga qiziqish nihoyatda yuqori va buning o'ziga yarasha sabablari bor. Birinchidan, oliy liganing yangi vakili “Obod” mamlakat chempionati va kubogi bahslarida chiroyli o'yinlari bilan muxlislarni xushnud etmoqda. To'g'ri, jamoa hali milliy chempionatda g'alaba qozonganicha yo'q. Biroq, “obod”chilar o'yinida mano va mazmun borligini muxlisu-mutaxassislar etirof etishyapti. Bu esa ertangi o'yin oldidan muxlislar qalbida ijobiy natijaga umid uyg'otmoqda. Biroq, joriy mavsumni ko'tarinki ruhda boshlagan navoiyliklar ham g'olibona odimini davom ettirishdan umidvor. SHunday ekan, shanba kuni ishqibozlar “JAR” stadionida ajoyib futbol spektakliga guvoh bo'lishlariga shubha yo'q.

Professionalizm sari dadil odimlayotgan “Obod” jamoasi OFK talablaridan kelib chiqqan holda bo'lajak o'yinga chiptalar sotuvini yo'lga qo'ydi. “Obod” – “Qizilqum” bahsini bevosita stadiondan tomosha qilish istagida bo'lgan muxlislar 8 apreldan chiptalarni “JAR” stadioni kassalaridan xarid qilishlari mumkin. CHiptalar bahosi 7 mingdan 15 ming so'mgacha qilib belgilangan. SHoshiling, chiptalar cheklangan miqdorda!

O'zbekiston XXV milliy chempionati. 4-tur.
“JAR” stadioni. 9 aprel, 16:00
Obod (Toshkent) – Qizilqum (Navoiy)
Hakamlar: R.Ermatov, A.Rasulov, J.Saidov, R.Lutfulin (barchasi Toshkent shahridan)
Nazoratchi hakam: R.Serazetdinov (Toshkent)