Jerrardda 6, Runida 5, Ronalduda 4, Keynda 3...

Unda Londonning "Tottenxem" klubi hujumchisi Xarri Keyn laureat bo'ldi. SHunday qilib, Angliya terma jamoasi azosi faoliyatida uchinchi bor APLda oyning eng yaxshisi bo'ldi. 2015 yil yanvar va fevral oylarida ham Keyn tengsiz bo'lgandi.

Ushbu sovrin 1994 yildan buyon o'z egalariga topshirilib kelinmoqda.

Oyning eng yaxshi futbolchisi bo'lish bo'yicha "Liverpul" sobiq sardori Stiven Jerrard mutloq rekordchi. Ayni paytda AQSHda o'ynayotgan yarim himoyachi olti marta shunday sovringa ega chiqqan. Robin van Persi hamda Ueyn Runi hisobida beshtadan sovrin bor.

Dennis Bergkamp, Terri Anri, Frenk Lempard, Krishtianu Ronaldu, Pol Skoulz va Alan SHirer to'rt martadan oyning eng yaxshisi bo'lishgan.

Xarri Keyn kabi 3 martadan laureat bo'lganlar ro'yxati: Serxio Aguero, Robbi Kin, Piter Odemvingie, Ruud Van Nistelroy, Garet Beyl, Duayt York, Eshli Yang.

Olti marta bu sovrin bir vaqtning o'zida ikki futbolchiga topshirilgan. So'nggi marta shunday holat 2014 yil mart oyida sodir bo'lgandi. O'shanda "Liverpul" klubining ikki vakili Luis Suares va Stiven Jerrard eng yaxshi deb topilgandi.

Sovrinning eng birinchi egasi germaniyalik Yurgen Klinsmann hisoblanadi. 1994 yil avgust oyida "Tottenxem" hujumchisi ushbu sovringa loyiq ko'rilgan edi.

Klublar borasida sovrin eng ko'p "Manchester Yunayted" futbolchilariga topshirilgan - 33 marta. Keyingi o'rinlarni "Arsenal" (28) va "Liverpul" (22) egallab turishibdi.

To'rt futbolchi ketma-ket ikki oy bu sovringa ega chiqqan: Dennis Bergkamp (1997 avgust va sentyabr), Krishtianu Ronaldu (2006 noyabr va dekabr), Xarri Keyn (2015 yanvar va fevral), Jeymi Vardi (2015 oktyabr va noyabr).