Alibobo Rahmatullaev: "Navbahor" jamoasi muxlisi bo'lib qolaman"

"Yangi jamoaga kelganimdan xursandman. "Ravon" klubi o'z oldiga yaxshi maqsadlar qo'ygan. Bu jamoa hali yosh. Faoliyatimda biroz to'xtalish bo'lib, o'yinim orqaga qarab ketgandi. Asta-sekin o'z sport formamni tiklab bormoqdaman. Bu taklif men uchun oldinga tashlangan qadam bo'ldi desam adashmayman. Xudoga shukur, barchasi yaxshi kechmoqda. Meni mavsum o'rtasida qo'yib yuborgani uchun "Navbahor" jamoasi, xususan Baxtiyor Ashurmatovga katta rahmat aytaman. Kamdan-kam murabbiylar bunga rozilik bildirishadi. Umuman "Navbahor" jamoasidagi barchaga tashakkur bildiraman. Ushbu jamoadan chetga chiqib ketmoqdaman. "Navbahor" jamoasi menga tramplin vazifasini bajarib berdi desam yanglishmayman. "Navbahor"dagi barcha futbolchilarga omad tilagan holda, "Dinamo"ga qarshi o'yinda ulardan g'alaba kutaman. Men "Navbahor" jamoasi muxlisi bo'lib qolaman. To'g'risi, kam muddat o'ynagan bo'lsamda, "Navbahor" jamoasi juda yoqqandi. Bu erdagi muxlislar meni yuragimdan joy olishdi. Hali boshqa hech qaerda bu kabi fidoiy, futbolni sevadigan ishqibozlarni ko'rmagandim. Ular jamoa qo'llab-quvvatlashda juda faol. Mashg'ulotlarda ham muxlislar tashrif buyurishlari guvoh bo'lgandim. Umid qilamanki, "Navbahor" jamoasi kelgusida ko'plab yutuqlarga erishadi.

Yangi jamoam bilan 13 sentyabrda Xudo xohlasa Bokuning "Neftchi" klubiga qarshi derbi o'yinida maydonga tushaman. Bu o'yin qiymati juda baland ekan. Bu erda imkon qadar o'zimni ko'rsatib, yurtimiz futbolini munosib himoya qilishga harakat qilaman", - deydi Alibobo Rahmatullaev.