Andrey Miklyaev: "Guruhdan "Lokomotiv" va "Al Nasr" chiqsa adolatdan bo'lsa kerak"

Bugun  o'yin bo'ladigan "Al Maktum" stadionida ertangi bahs oldidan matbuot anjumani tashkil qilindi. Unda "Lokomotiv" bosh murabbiyi Andrey Miklyaev hamda jamoa yarim himoyachisi Sardor Mirzaev ishtirok etdi.

A.Miklyaev: - Avvalambor bizni yaxshi kutib olishgani uchun "Al Nasr" futbol klubiga o'z minnatdorchiligimni bildiraman. Biz Dubayga oldin ham kelganmiz va bu shahar doim iliq taassurot qoldirgan. Bevosita ertangi uchrashuvga to'xtaladigan bo'lsam, o'ylaymanki, ikkala jamoa ham o'zining eng yaxshi o'yinini ko'rsatishga harakat qiladi. CHunki hozirda ikkala jamoada ham keyingi bosqichga chiqish uchun yaxshi imkoniyat mavjud. Bizning maqsad chiroyli o'yin ko'rsatgan holda safardan ijobiy natija bilan qaytish va buning bor kuchimizni ishga solamiz".

S.Mirzaev: - Avvalo hammaga Assalomu Alaykum! Bosh murabbiyimiz aytib o'tganidek, ertangi uchrashuv biz uchun muhim ahamiyatga ega. Biz raqibni hurmat qilamiz. SHuning qatorida chiroyli o'yin ko'rsatgan holda g'alaba bilan qaytishni xohlaymiz. O'ylaymanki, ertangi o'yin qiziq kechadi.

- Malumki, "Al Nasr" va "Lokomotiv" 2013 yilgi Osiyo chempionlar ligasida ham bir-biriga qarshi bahs olib borgan. SHundan beri har ikkala jamoa qanchalik o'zgardi deb o'ylaysiz?
A.Miklyaev: - SHundan beri ozmi-ko'pmi vaqt o'tdi, futbol bir joyda turgani yo'q. Biz ham, raqib ham kuchayishda davom etmoqda. Buni jamoalarning bu yilgi chempionlar ligasidagi ishtiroki ham aytib turibdi. O'tgan yil guruh o'yinlaridan o'ta olmagandik, ammo bu safar qulay imkoniyatni qo'ldan boy bermaymiz degan umiddamiz.

- Guruhdagi vaziyat haqida qanday fikrdasiz?
A.Miklyaev: - Musobaqa boshlanmasidan oldin Saudiya Arabistonining "Al Ittihod" klubi guruh favoriti bo'ladi deb o'ylagandim. Lekin o'zingiz ko'rib turgandek futbolda oldindan bir narsa deyish qiyin. Hozir biz birinchi, ertangi raqib "Al Nasr" esa ikkinchi o'rinni egallab turibdi. Agar shu ikki jamoa keyingi bosqichga yo'l olsa, bu adolatdan bo'lsa kerak.  

- "Lokomotiv" ham ichki chempionatda, ham OCHLda ijobiy natija qayd etmoqda. Buning sababi nimada?
A.Miklyaev: - Asosiy sabablaridan biri jamoamizning ahilligida. To'g'ri, bizning tarkibda "Al Nasr"dagi kabi nomdor legionerlar yo'q, lekin bizda terma jamoaga nomzod kuchli mahalliy o'yinchilar yig'ilgan. SHuning evaziga yaxshi natijalar qayd etib kelyapmiz deb o'ylayman.

"Lokomotiv" PFK matbuot xizmati.