Omadjon Tayloqov: "Urganchda qiyin o'yin bo'ladi"

Bahsdan keyin yarimhimoyachi fikrlari bilan o'rtoqlashdi.

Avvalambor, bugun yomg'irli havoga qaramay, stadionga kelib Dinamoni qo'llab-quvvatlab turgan barcha muxlislarimizga rahmat deb, minnatdorchilik bildiraman - deya gap boshladi Omadjon Tayloqov.

- Birinchi Liganing dastlabki ikki turida safarda ochko yo'qotganligimiz bois, uyimizdagi har ikki o'yin Norin va UzDongJu jamoalarini mag'lub etishimiz shart edi. Bu vazifani uddalaganimizdan xursandman. Har ikki o'yinda ham murabbiylarimiz ko'rsatmasini to'g'ri bajarishga intildik va g'alaba qozondik. Ilhom aka SHaripov imkonqadar hujumkor to'p surishimizni so'raydi va so'nggi ikkita o'yinda bu o'z samarasini berdi. To'g'ri, vaziyatlardan to'liq foydalana olmayotgandirmiz, ammo keyingi o'yinlarda bu kamchiliklarimiz ustida ham ishlaymiz.

- Yagona golingiz g'alaba keltirishini kutganmidingiz?

- Raqib jamoa himoyada yaxshi o'ynadi. Biz esa juda ko'p hujum qildik. Omadimiz kelib, vaziyatlardan foydalanganimizda hisob yanada yirik ko'rinish olishi mumkin edi. Golim g'alaba keltirganidan juda xursandman.

- Keyingi o'yinda Dinamo Urganchga safar qiladi. Xorazm jamoasi esa sizga begona emas…

- CHindan ham Urganchda qiyin o'yin bo'ladi. Xorazmda to'p surganman. Ushbu jamoaning tarkibi bir necha yillardan buyon deyarli o'zgarmagan. SHu bois, Xorazm futbolchilari bir-birlarini maydonda yaxshi tushunishadi. Orol jamoasi haqida ham shunday deyish mumkin. Umuman olganda, Xorazm va Orol maydonlarida hech kimga oson bo'lmaydi. O'ylaymanki, yaxshi tayyorgarlik ko'rib, safardagi ikki uchrashuvdan ham g'alaba bilan qayta olamiz.

Dinamo Matbuot xizmati.