OCHL. 5-tur ramziy terma jamoasi

Odatimizga ko'ra O'zbekiston klublari futbolchilaridan tuzilgan ramziy terma jamoani tuzib chiqdik.

Darvozabon
Eldorbek Suyunov ("Nasaf")

Darvoza "Nasaf" posboni Eldorbek Suyunovga topshirildi. Bu turda Suyunov o'zining ishonchli o'yini bilan sheriklariga namuna bo'ldi. Eldorbek gol o'tkazdi, lekin bir necha bor o'z darvozasi tomon yo'llangan xavfli zarbalarni qaytarib turdi.




Himoyachilar
Maqsud Karimov ("Nasaf")
Davron Hoshimov ("Paxtakor")
Salim Mustafoev ("Lokomotiv")
Kamoliddin Tojiev ("Paxtakor")

"Nasaf" vakili Maqsud Karimov OCHL tarixidagi eng tezkor gollardan biriga mualliflik qildi. Birinchi daqiqadayoq Karimov burchakdan oshirilgan to'pni raqib darvozasiga joylab qo'ydi. Qolgan daqiqalarda esa "Al Ayn"ning legioner hujumchilariga o'yin bermaslikka harakat qildi. Xatolar bo'ldi, lekin ko'p vaziyatlarda Maqsud ishonchli o'ynadi.

"Paxtakor" klubi BAAda "Al Jazira"ni 3:1 hisobida taslim qildi. "SHerlar" himoyachisi Davron Hoshimov o'ng qanotda doimgidek faol o'ynadi. Jamoa sardori Kamoliddin Tojiev esa markazda ancha yaxshi harakat qildi.

Salim Mustafoev "Al Nasr" bilan safardagi o'yinda jamoasining himoyasida faol o'ynadi. O'ng qanotda raqibning hujumlarini qaytarishdi va hujumlarni boshlashda Salim sheriklariga yordam berib turdi. 

Yarim himoyachilar
Jaloliddin Masharipov ("Paxtakor")
Server Jeparov ("Lokomotiv")
SHerzod Karimov ("Paxtakor")
Javlon Ibrohimov ("Bunyodkor")

SHerzod Karimov "Al Jazira" darvozasiga supergol urishga muvaffaq bo'ldi. Uchrashuv davomida SHerzod bir nechta xavfli hujumlarni tashkil qilishda yaxshi o'ynadi. Jaloliddin Masharipov chap qanotda faol bo'ldi. Unda gol urish uchun qulay imkoniyat bo'lgandi, biroq zarba biroz noaniq ketdi.

"Bunyodkor" yarim himoyachisi Javlon Ibrohimov uzoq tanaffusdan so'ng yana asosiy tarkibga qaytdi. Jamoa 0:2 hisobida yutqazganiga qaramay Javlon uchrashuvda boshqalarga nisbatan kamroq xato qildi.

Osiyoning ikki karra eng yaxshi futbolchisi jarohatidan qutulib yana avvalgi saviyasiga qaytmoqda. Server jamoaning hujumlarini boshlashda ancha faol harakat qilmoqda. Aynan uning burchakdan uzatgan to'pidan so'ng Temurxo'ja gol urdi.

Hujumchilar
Temurxo'ja Abduxoliqov ("Lokomotiv")
Igor Sergeev ("Paxtakor")

Temurxo'ja Abduxoliqov OCHLda o'zining 4-golini urib "Lokomotiv"ga juda muhim bo'lgan bir ochkoni olib berdi. Abduxoliqov ikkinchi bo'limda burchakdan uzatilgan to'pni raqib darvozasiga yo'llab hisobni tenglashtirgandi.

Igor Sergeev esa "Al Jazira" darvozasiga 2ta gol urib OCHLdagi gollari sonini 5taga etkazib oldi. Hujumchi BAAda juda ham faol o'ynadi. Raqib himoyachisidan to'pni olib qo'yib kuchli zarba bilan gol urdi, bahs oxirida esa o'zi penalti ishlab o'zi uni aniq amalga oshirdi.