Davron Fayziev: "SHunday penaltini belgilab futbolni rivojlantiramiz desak, unda bilmadim..."

"Andijon"ni g'alaba bilan tabriklayman. Baxtiyor Ashurmatov jamoada katta ko'lamdagi ishni bajargani ko'rinib turibdi. Bugungi birinchi va uchinchi gollariga etirozim bor. Bularni videoda ko'rib chiqishim kerak. Agar mana shunday penaltini belgilab futbolni rivojlantiramiz desak unda bilmadim qanday o'ynash kerak? Yutqazib turib bahona qilmoqchi emasman. Ko'rdingiz 10 kishi bo'lib ham raqibdan qolishmadik. Futbolda mag'lubiyatlar ham uchrab turadi, lekin bunday mag'lub bo'lish alamli. Kurashda davom etamiz, "Navbahor", "Lokomotiv" va "Neftchi"ga qarshi o'yinlardan so'ng hurmat qila boshlashdi. Balki yigitlarimiz "osmonga chiqib ketishgandir", - deydi Fayziev.

"Ikkinchi golda o'zimiz xato qildik, uchinchi golda esa o'yindan tashqari holat bor edi menimcha. Penalti bo'lmaganida o'yin natijasi boshqacha bo'lishi mumkin edi. SHunday penaltini "Andijon" darvozasiga belgilasa qanday bo'lishini o'ylab ko'rish kerak. O'tgan yil ham Andijondagi o'yinda aynan shu hakam ishlagandi... Bu bahona emas".

"Akmal Xolmurodov uchinchi marta qizil kartochka oldi? O'tgan ikkita o'yinda qizil kartochkani haqli tarzda olgandi. Lekin bugungi o'yinda raqib futbolchisi Akmal Xolmurodovning chig'iga tegdi va himoyachimiz o'zini bosa olmadi. O'tgan yil "Neftchi" bilan o'yinda xuddi shunday holatda raqib futbolchisi Akmal qilganidek bizni o'yinchini turtib yuborganida sariq kartochka berilgandi. Bugun esa qizil berdi".

"Hakamlarga tanaffusdan oldin nima dedim? Ozgina vijdonan boshqaringlar dedim. Temur Hakimov "Lokomotiv"ga qarshi o'yindan oldin jarohat olgandi. SHu bois hozircha asosiy tarkibda tushishga tayyor emas", - deydi Davron Fayziev. 

"So'g'diyona" matbuot xizmati