Bahrom Hakimov: "SHogirdim Baxtiyor Ashurmatovning o'yin uslubini o'rganib chiqqandik"

- Avvalambor, Dinamo jamoasini mana shunday shiddatli va juda asabiy o'yinda tinmay qo'llab-quvvatlab turgan muxlislarni g'alaba bilan tabriklayman. Uyimizdagi so'nggi o'yinda SHo'rtan bilan 3:3 hisobida durang o'ynaganimizdan so'ng bugun ham futbolchilar g'alabani qo'ldan boy bermaslik uchun katta bosim ostida to'p surishdi. SHukurki, yakunda o'zimiz uchun juda muhim bo'lgan g'alabani qo'lga kiritdik. Jamoam o'yinidan qoniqdim.

- Navbahor jamoasini mag'lub etishda shogirdingiz Baxtiyor Ashurmatovning imkoniyatlarini bilishingiz sizga qo'l keldimi?

- Bilasizmi, ushbu o'yinga tayyorgarlik ko'rish uchun bizda ikki hafta vaqt bor edi. Ushbu muddat davomida Namangan jamoasining so'nggi o'yinlarini to'liq o'rganib chiqib, shunga yarasha tayyorgarlik ko'rgan edik. SHu jumladan shogirdim Baxtiyor Ashurmatovning ham qanday o'yin uslubida to'p surishini o'rgangandik. O'tgan hafta SHo'rtan bilan nazorat bahsi o'tkazganimiz ham o'yinga yaxshiroq tayyorgarlik ko'rishimizni taminladi.

- So'nggi o'yinlar paytida juda asabiylashayapsiz. O'yin borasida nimadan qoniqmayapsiz?

- Har o'yinda ustunlik qilib, vaziyatlar yaratayotgan bo'lsakda juda katta bosim ostida to'p surayotgandekmiz. Natijada futbolchilar asablarini jilovlamay hakam tomonidan jazolanmoqdalar. Qator sariq kartochkalar esa muhim o'yinlarda asosiy futbolchilarimizsiz qolishimizga sabab bo'lmoqda. Bu borada futbolchilar bilan ish olib boramiz.