Jafar Irismetov “Obod” bosh murabbiyi. Ammo o'zi qaerda?

Biroq kuchlilar orasida munosib ishtirok etish oson ish emas. Boz ustiga “Obod” tarkibi asosan yosh o'yinchilardan tashkil topgan. Bunday vaziyatda esa tabiiyki, jamoaga juda qiyin bo'ladi. Hozircha ular 7 ta uchrashuv o'tkazishdi va 2 ta durang, 5 ta mag'lubiyat qayd etishib, ikki ochko jamg'arishdi. Ko'rib turibsizki, bu klub hali g'alaba qozongani yo'q.

Eng ahamiyatli tomoniga to'xtaladigan bo'lsak, klubda bosh murabbiy masalasi tushunarsiz bo'lib turibdi. Avvaliga qishki tayyorgarlik chog'ida jamoaga bosh murabbiy sifatida SHavkat Abduxo'jaev tayinlandi. Muxlislarga yaxshi malumki, u darvozabonlar murabbiyi hisoblanadi va asosan ishlagan klublarida aynan posbonlar bilan ishlab kelgan. Abduxo'jaev sira ham biror-bir klubda bosh murabbiylik qilmagan. Unda “Obod”ga nima uchun ushbu lavozimga tayinlangandi? CHunki unda bosh murabbiylik qilish huquqini beruvchi licenziya bor edi. O'tgan yili “Obod”ning birinchi ligadan oliy ligaga chiqishiga katta hissa qo'shgan murabbiylar – Bobur Zuhriddinov hamda Xayrulla Abdievda esa bunday imkoniyat yo'q. Abdiev yoshlar jamoasini boshqarayotgan bo'lsa, Zuhriddinov hali yosh bo'lgani sababli unda mustaqil bosh murabbiylik qilish tajribasi kam. Qolaversa, unda licenziya ham yo'q. SHu bois SHavkat Abduxo'jaev bosh murabbiy bo'ldi. Ammo bu shunchaki rasmiyatchilik uchun edi xolos. Murabbiy esa asosan darvozabonlar bilan ishlayotgandi. Bobur Zuhriddinov esa amalda barchasini o'zi bajarib kelmoqda. Biroq Abduxo'jaevning “Obod”dagi faoliyati uzoqqa cho'zilmadi. Yaqinda klubni tark etdi va “So'g'diyona” jamoasida ish boshladi. Bu masala bo'yicha uning o'ziga murojaat qilganimizda shunday dedi: “Ha, mening “So'g'diyona”ga o'tganim rost. Bosh murabbiy Davron Fayziev birga ishlashni taklif qildi. Hammasini obdon o'ylab ko'rganimdan so'ng Jizzaxga ketishga qaror qildim. “Obod” jamoasidagilar bilan esa do'stona ravishda xayrlashdik. U erda men qog'ozdagina bosh murabbiy edim xolos”.

Xullas, SHavkat Abduxo'jaev endi “So'g'diyona”da darvozabonlar bo'yicha murabbiy sifatida ishlamoqda. Xo'sh, klubda uning o'rnini kim egalladi? Bu savolga javob esa Jafar Irismetov. Abduxo'jaev ham Irismetovning bosh murabbiy bo'lganini aytdi. Vaziyatga oydinlik kiritish uchun Jafar bilan ham bog'langanimizda “Obod” bosh murabbiyi bo'lganini tasdiqladi. Biroq...

Bu masalasini lekin tomoni bor. Irismetov ham xuddi Abduxo'jaev kabi nomigagina bosh murabbiy bo'ldi xolos. Qog'ozda uning nomi ko'rsatilaveradi, ammo amaldagi ishlarni boshqa murabbiylar bajarishyapti. U holda Irismetov qaerda degan savol tug'iladi, shunday emasmi? Bilamizki, ushbu murabbiy qishda “Obod” klubida chindan ham ish boshlagandi. O'shanda jamoani mavsumga tayyorlashda asosiy ishni bajargandi. Keyin esa klub BAAga o'quv-mashg'ulot yig'ini uchun jo'nab ketdi. Ammo Irismetov ayrim sabablarga ko'ra bu yig'inga borgani yo'q. Safardan qaytib kelishgach esa Jafar chetga chiqib qoldi. CHunki jamoa mashg'ulotlarida u ko'rinmay qoldi. Bu borada uning o'zi bilan ham aloqada bo'lib turdik va rostdan ham mashg'ulotlarda qatnashmayotganini bildirdi. Vaholanki, u futbolchilarni qishda jismoniy tomondan tayyorlagandi, yani, asosiy ishni bajargandi. Kuni-kecha esa “Obod”ga bosh murabbiy bo'lganini eshitib, o'zi bilan yana bir bor gaplashganimizda xuddi SHavkat Abduxo'jaev aytgan gapni aytdi. Klubda qog'ozdagina bosh murabbiy bo'lganini, lekin klubga hech qanday aloqasi yo'qligini malum qildi. Qiziq, unday bo'lsa nima sababdan Jafar Irismetovni bosh murabbiy etib tayinlashdi? Voholanki, uning o'zida ham murabbiylik qilish qobilyati etarli edi. Futbolchilikni tugatganidan keyin asosiy maqsadi murabbiy bo'lish edi va o'zini ushbu kasbga bag'ishladi. Qishda “Obod”da ish boshlaganida murabbiy sifatida oliy ligada jiddiy ishga kirishdi deya o'ylagandik. Ammo voqealar rivoji keyinchalik biz kutmaganda o'zgarib ketdi. Agarda Irismetovning o'ziga qolsa u klubda ishlab murabbiy sifatida jamoaga yordam berishga qarshi emas. Endi esa bosh murabbiy etib tayinlansayu, o'z ishini bajarmasa?! Balki unga bunday lavozimda ishlash uchun imkon berish kerakdir?! Irismetovda murabbiy sifatida ishlab o'zini ko'rsatishga ishtiyoqi baland. Ayniqsa, futbolchilik faoliyati davomida tajribali mutaxassislardan ko'p narsa o'rganganini bir necha bor takidlagan. Qolaversa, murabbiylikka o'tganidan keyin ham u o'qib izlanishda davom etayotganini bilamiz. Demoqchimizki, u yaxshi kadr bo'lib etishyapti. Lekin o'zini ko'rsatishi uchun ishlashiga imkon berilmayapti. Qiziq tomoni shuki, “Obod” bosh murabbiyi Jafar Irismetov, lekin u boshqa ishlar bilan tirikchiligini qilib yuribdi. Balki u bilan klub rahbariyati o'rtasida og'zaki kelishuv bo'lgandir. Baribir Jafar bu lavozimda ishlab jamoani boshqarib ko'rsa yomon bo'lmasdi.

“Obod”ni esa oldinda yanada qiyin o'yinlar kutyapti. Aslida debyutant jamoa uchun chempionat og'ir kechishi avvaldan malum edi. Tarkibdagi o'yinchilarning ko'pchiligi hali oliy ligada o'ynashmagan va uning muhitini endi his qilishni boshlashdi. Aksariyati yosh futbolchilardan iborat bo'lgan jamoaga to'g'ri yo'l-yo'riq ko'rsata olish darkor. Albatta, Bobur Zuhriddinov ham yosh va talabchan murabbiy. Biroq uning o'ziga oliy ligada bir jamoani boshqarish murakkab bo'lmoqda. Agarda bu ketishda bo'lsa, “Obod” yana o'z joyi – birinchi ligaga qaytib ketishi ham hech gap emas. Bunday vaziyatda esa klubga yana murabbiy kerak. Demak, Irismetov chindan ham bosh murabbiy bo'ldimi, unga ushbu lavozimda ishlash uchun imkoniyat berish kerak emasmi? Jafar Bobur Zuhriddinov bilan murabbiylar shtabida yaxshi tandem hosil qilgan bo'lardi. Bu hol klub manfaati uchun zarur ekanligini ham unutmaslik kerak.   

SHuhratbek JO'RAEV