Andrey Derkach: Qizilqum jamoasiga nafim tegsa bundan xursand bo'laman
/ Kiritdi: BestMaster O'qilgan: 926
Oliy liga to'qqizinchi turidan joy olgan Qizilqum - Andijon jamoalari (2:1) uchrashuvidan so'ng, mezbonlarning ukrainalik legioneri Andrey Derkach o'yin haqida o'z fikrlarini bildirdi.
-Oxirgi ikki turdagi omadsizlikdan so'ng, muxlislarimizga g'alaba taqdim qilganimizdan juda mamnunmiz, - deydi Andrey Derkach. - Andijon - chempionatning shakllangan va kuchli jamoalaridan biri sanaladi. O'tgan yilgi mavsumda bu jamoani Navoiyda 1:0 hisobida mag'lubiyatga uchratgandik. O'shanda mening kiritgan yagona golim konchilarga muhim uch ochkoni tuhfa qilgandi.
Bu galgi uchrashuvda kutilmaganda jamoadoshim Georgiy Kvesieshvili o'z darvozamizni ishg'ol etib qo'ydi. Avtogoldan hech kim kafolatlanmagan. SHu bois, biz sarosimaga tushib qolmadik. Oradan ko'p o'tmay, raqib darvozasiga to'p kiritib, hisobni tenglashtirdim. Bundan ruhlanib olti daqiqa o'tar-o'tmasdan hisobda oldinga chiqib oldik. Muxlislarni g'alaba bilan tabriklayman.
Navoiyda ahil va inoq jamoa shakllangan. Bu erdagi shart-sharoitlar va muxlislarning faolligi bizni faqat g'alaba sari undayapti. Bir necha yildirki, Qizilqum jamoasi tarkibida o'ynayapman. Jamoamga nafim tegsa, bundan faqat xursand bo'laman.
Qizilqum PFK Matbuot xizmati.
Bosh sahifaga
353