Fayzulla Qambarov: Murabbiylar ishonchi kuchimga kuch qo'shmoqda

- Maydonga faqat g'alaba ishtiyoqida tushgandik, - deydi Fayzulla Qambarov. - Avvaliga o'z darvozamizdan to'p olib chiqib, yakunda muxlislarimizga g'alaba ulashganimizdan xursandmiz. Juda qiyin o'yin bo'ldi. Raqib jamoasida Nemanya Yovanovich kabi tezkor hujumchini qo'riqlash va unga imkon qadar maydonda erkin harakat qilishiga yo'l qo'ymaslik vazifasi zimmamga yuklatilgandi. Buni uddaladim, deb o'ylayman.

Oldingi mavsumlarda ko'proq zaxira o'rindig'idan o'yinga qo'shilardim. Bu yilgi mavsumdan boshlab jamoamiz bosh menejeri va murabbiylari meni boshlang'ich tarkibda maydonga tushirishyapti. Bunday etibor va ishonch kuchimga kuch qo'shmoqda. Raqib kim bo'lishidan qatiy nazar keyingi o'yinlarda ham muxlislarimizga chiroyli va hujumkor futbol tuhfa qilishga harakat qilamiz.

Qizilqum PFK Matbuot xizmati.