"Qo'qon-1912": Vodiy derbisi 16:30da boshlanadi

Jamoamiz azolari ushbu bahsga munosib tarzda tayyorgarlik ko'rishdi, desak mubolag'a bo'lmaydi. Ayni damda barchaning kayfiyati yuqori. Murabbiylar shtabi ham futbolchilarni maksimal darajada tayyorlashga harakat qilishdi. Bugun muxlislar ajoyib futbol guvohiga aylanishlariga shubha yo'q.

Ushbu jamoalarning Namanganda bo'lib o'tgan birinchi uchrashuvida vakillarimiz 1:0 hisobida g'alaba qozonishgandi. Hozircha ustunlik biz tomonda.

Kecha futbolchilarimiz uchrashuv oldidan so'nggi mashg'ulotni “Markaziy” o'yingohda o'tkazishdi.

Bugun Qo'qondagi “Markaziy” o'yingohda bo'lib o'tadigan uchrashuv soat 16:30da boshlanadi. O'yin uchun chiptalar stadion kassalarida ikki xil toifada 10 000 va 5 000 so'mdan sotilmoqda.

Barcha futbol muxlislarni “Markaziy” o'yingohga chorlab qolamiz. Aynan muxlislarning qo'llab-quvvatlashlari bugungi Vodiy derbisida jamoamiz azolariga qo'shimcha kuch bag'ishlashi aniq. Zero, biz har doim muxlislar bilan faxrlanib kelganmiz.