Berlinda o'zbek futbol bayrami o'tkazildi

Aynan shu kuni Germaniyaning Berlin shahrida ananaga aylanib ulgurgan, Evropa davlatlarida istiqomat qilayotgan va tahsil olayotgan 200 dan oshiq o'zbekistonliklar o'rtasida  to'rtinchi marotaba futbol turniri bo'lib o'tdi. Ushbu turnir "Davra" o'zbek-nemis madaniy jamiyati tashabbusi va O'zbekiston Respublikasining Berlin shahridagi Elchixonasi ko'magi ostida yuqori saviyada tashkil qilindi.







Jami 12 jamoadan iborat bo'lgan 2 guruhda turnir kubogini qo'lga kiritish uchun shiddatli va qiziqarli bahslar bo'lib o'tdi. Turnirda Germaniya davlatining Myunxen, Dortmund, Frankfurt; Triesdorf va Berlin shahri jamoalaridan tashqari CHexiya davlatidan Praga jamoasi ham  ishtirok etdi. Musobaqada fahrli 3-o'rinni "FK TIIM" (Toshkent Irrigaciya va Melioraciya Instituti) va "FK Nihol" jamoalari, 2-o'rinni Rhein Main Yunayted jamoasi va turnir kubogini Myunxen jamoasi qo'lga kiritdi.




Bundan tashqari tashkilotchilar tomonidan turnirning eng yaxshi darvozaboni va eng yaxshi o'yinchisi aniqlanib, ularga esdalik sovg'alari topshirildi.

"FK Nihol" jamoasi yarim final bahsida turnir g'olibi Myunxen jamoasiga mag'lubiyatga uchragan bo'lsada, jamoaning bu yilgi natijasidan qoniqish hosil qilishdi. Mazkur futbol jamoasi Berlin shahrida tashkil etilgan "Nihol" o'zbek-nemis madaniy va ilmiy jamiyati negizida tashkil qilindi. Jamoada Germaniyaning turli oliy o'quv yurtlarida tahsil olayotgan o'zbekistonlik talabalar va jamiyat azolari to'p tepishdi.

Turnir davomida qatnashchilar uchun o'zbek milliy taomi osh tortiq qilindi.

Turnir so'ngida g'olib jamoa "FK Myunxen" hamda 2-o'rin sohibi "FK Rhein Main Yunayted" jamolariga medallar topshirildi. Bundan tashqari "FK Myunxen" jamoasiga Evropada chempionlar ligasi kubogi shaklida tayyorlangan kubok ham topshirildi.

"Davra" o'zbek-nemis madaniy jamiyati tomonidan uyushtirilgan ushbu tadbir Evropada istiqomat qilib kelayotgan vatandoshlarni bir joyga to'plash hamda bayramona kayfiyatda kunni birgalikda o'tkazishda katta hizmat ko'rsatdi. Ushbu turnir kelasi yil ham tashkil qilinishi tashkilotchilar tomonidan takidlab o'tildi.

Abdurashid Nasirdinov
Berlin, Germaniya