Doniyor Odilov: "Yigitlar uchun xursandman"

O'yin paytida uning fikrlari bilan qiziqdik:

- Yigitlar uchun juda xursandman. Bugun ular o'zlarining eng ijobiy tomonlarini namoyish etishdi. Ayniqsa Jasur Hakimov boshqalardan ajralib turdi. Kiritilgan uchala golda ham qatnashdi. Bundan tashqari butun o'yin davomida ikkinchi qavatda mezbonlarga o'yin bermadi. To'pni to'xtatish, egallab olish, nazoratda ushlab turish hujumchi uchun juda kerakli xislatlar. Jasurning bugungi hatti harakatlari shaxsan meni xursand etdi. Ergash Ismoilov ham mavsumdagi birinchi golini kiritdi. Uni ham bu muvaffaqiyat bilan tabriklayman. Bugun o'zi omadli kun bo'ldi. Ertalab SHohnazar Norbekovning o'g'illi bo'lganligini eshitib, xursand bo'lgandik. Jamoadoshlar shu bois gol kiritganimizda chaqaloqni “belanchak” uslubida tabriklashdi. Yangi go'dakning umri uzoq bo'lishini, oilasiga, jamiyatimizga munosib inson bo'lib ulg'ayishini tilayman.

- O'zimga keladigan bo'lsam, dushanba kunidan individual shug'ullanishni boshlayman. “Nasaf” bilan o'yinda jiddiy shikaslangan ekanman. To'pig'im shishib, ikki kun yurolmadim. SHish endi qaytayapti. Nasib bo'lsa, “Qizilqum”ga qarshi uchrashuvgacha safga qaytib qolarman.

- “Qizilqum” kuchli jamoalardan biri. Ularga qarshi o'yin oson kechmaydi. Buning ustiga mehmonda, ko'plab tomoshabinlar qarshisida o'ynash oson bo'lmasligini Buxoroda his etgandik. Lekin ijobiy natijadan umid uzmaymiz.

- O'zbekiston kubogining keyingi bosqichidagi raqibimiz “Bunyodkor” bo'lishiga shubha yo'q. “Qaldirg'ochlar" “Obod”dan kuchli. Biz esa raqib tanlamaymiz. Keyingi bosqichlarda ham muxlislarimizni xursand etishga harakat qilamiz, - deydi Odilov.

"Metallurg" matbuot xizmati