"Universiada - 2016" Mashalasi Farg'onaga yaqinlashmoqda

Bugun esa Mashala Farg'ona viloyati sari yo'l oldi.  “Universiada – 2016” mashalasi olib o'tiladigan shahar va qishloqlarda tantanali marosimlar, sportchilarning chiqishlari o'tkazilmoqda. Taniqli shoir va yozuvchilar, sanatkorlar, keng jamoatchilik vakillari, o'quvchi-yoshlar ishtirokidagi madaniy-marifiy va sport tadbirlari talabalarning yoshlik, go'zallik, birdamlik bayramiga hamohang kuy-qo'shiq va raqslarga ulanmoqda. Barchaning ko'nglida shodlik. Bugun farg'onaliklar yoshlik, shifoat bayramini o'zgacha ruhda kutib olishmoqda. Buni Mashala o'tayotgan paytda bilib olish qiyin emas.

Mashala marshruti masofasi 364,5 km bo'lib, shundan 338,5 km avtomobil va 26 km sportchilar estafetasi tashkil etadi. Toshkent, Namangan, Andijon viloyatlari va Farg'ona viloyati hududlarida mashala sharafiga keng jamoatchilik ishtirokida madaniy-marifiy tadbirlar o'tkazilmoqda. Mashalani eltadiganlar orasida sportchi yoshlar bilan bir qatorda Farg'onaning Dang'ara tumani, Qo'qon shahri, Uchko'prik, Bag'dod, Rishton, Oltiariq tumanlarida yashovchi taniqli insonlar, sport va mehnat faxriylari ham bor. Ko'ngillilar mashala o'tadigan ko'chalardagi aholini bu haqda xabardor qildilar.

Hozirga kelib Mashala Farg'onaga yaqinlashdi. Mashala  Dang'ara tumani, Qo'qon shahri, Uchko'prik, Bag'dod, Rishton, Oltiariq tumanlarini kesib o'tdi. Mashalani eltish marosimida yuqorida tilga olingan shahar ham tuman aholisi o'z hissasini qo'shmoqda. Farg'ona shahrida esa Mashalaning kelishi katta tantana bilan kutib olinishi rejalashtirilgan. Sanoqli soatlardan keyin hayajonli onlar boshlanadi.




“Universida-2016”: Ishtirokchilar tashrifi davom etmoqda

Bir necha daqiqalar so'ng, aniqrog'i, bugun soat 19:00da Farg'onadagi “Istiqlol” stadionida “Universida-2016” sport musobaqalarining ochilish tadbiri bo'lib o'tadi. Hozirga kelib musobaqa ishtirokchilari, rasmiy mehmonlar tashrifi davom etmoqda.

SHu paytga qadar Qashqadaryo va Surxondaryo viloyatlari vakillaridan tashqari barcha ishtirokchilar Farg'onaga etib kelib joylashib bo'lishdi.

Universiada ishtirokchilari va mehmonlarining Farg'ona va Marg'ilon shaharlarida joylashgan tarixiy obidalar, muzeylar, teatrlar hamda yangi barpo etilgan inshootlar bilan tanishish imkoniyatiga ega bo'lishadi.

SHuningdek. Musobaqalar jarayonida madaniy-marifiy tadbirlar dasturiga asosan viloyatning barcha shahar va tumanlarida mashhur sanatkorlar ishtirokida bayram shodiyonalarini tashkil etish rejalashtirilgan.

Abror Dehqonov