“Andijon” murabbiylari “Bolalar va o'smirlar futbol maktabi”ga tashrif buyurdi

Bundan ko'zlangan maqsad “Andijon” jamoasi murabbiylarining futbol maktabning hayoti bilan yaqindan tanishish, ish jarayonidan xabardor bo'lish hamda murabbiylar o'rtasida o'zaro bog'liqlikni yuzaga keltirib, hamkorlikni yo'lga qo'yish edi.

Bo'ston dahasida joylashgan “Bolalar va o'smirlar futbol maktabi”ga tashrif buyurar ekanmiz, u erda bir qator guruhlarning mashg'ulot o'tkazayotgan jarayonidan chiqdik. Direktor Bekzod Karimov va uning yordamchilari ijodiy guruhimizni iliq kutib oldi va maydonlarning xolati, futbol maktabida yaratilgan sharoitlar to'g'risida atroflicha tanishtirdi. O'z navbatida Baxtiyor Ashurmatov bilan SHuhrat Maqsudov ham bolalarning mashg'ulotini bevosita kuzatib bordi va murabbiylarga kerakli ko'rsatmalarni berdi.

Futbol maktabining majlislar zalida murabbiylar ishtirokida o'ziga xos ochiq muloqot o'tkazildi. Unda dastlab so'z Baxtiyor Azamovichga berildi.

– Avvalambor barchangizga xayrli kun. “Bolalar va o'smirlar futbol maktabi”ga tashrif buyurishimizdan ko'zlangan maqsad, shuki bu erda olib borilayotgan ishlar va iqtidorli bolalarni kuzatishdir. Barchamizning maqsadimiz eng avvalo viloyatning bosh jamoasi “Andijon”ni mahalliy futbolchilar ishtirokida barqaror jamoaga aylantirish. Klub vice-prezidenti Abdisolomov Marufjon Jamoldinovich viloyatda bolalar futboliga ham katta etibor qaratmoqda. Futbol maktabiga har tomonlama yordam berishga urinayotganini ko'rish mumkin. Mana futbol maydoninglar bilan tanishib chiqdik. Ajoyib xolatga keltirilganini ko'rdik.  Bu yo'lda hamfikr bo'lib, bosqichma-bosqich poydevor qurish niyatidamiz. SHu kungacha o'tkazilgan yig'ilishlarda bolalar futboliga jiddiy etibor qaratib, mustahkam poydevor qurish borasida gap bordi. Bu yo'lda siz murabbiylarning yordam bizga juda zarur. Maqsadimiz birlashish va aniq maqsad sari dadil qadam tashlash. Afsuski so'nggi yillarda tan olish kerak, Andijon futbolida orqaga siljish kuzatilgan. Jamoaning qayd etgan o'rinlari bilan tanishib chiqdim. 2010 yildan keyin orqaga ketilganini ko'rish mumkin. Qolaversa jamoada ish boshlagan paytimda tarkibda mahalliy futbolchilarning kamchilikni tashkil etgani meni havotirga soldi. Lekin ishonamanki, Andijon viloyatida iqtidorli futbolchilar talaygina. Ularni yuzaga chiqarish esa biz murabbiylarga ham bog'liq. Bu erga shunchaki rasmiyatchilik uchun kelmadik. Maqsadimiz sizlar bilan do'stona munosabatni yo'lga qo'yish va hamfikr bo'lib birgalikda bolalar futbolini kuchaytirishdir. Bu yo'lda qo'limdan kelganicha bor bilimim bilan yordam berishga tayyorman.

SHundan so'ng so'z navbati yordamchi murabbiy SHuhrat Maqsudovga berildi. 1994 yili Xirosimada bo'lib o'tgan Osiyo o'yinlari g'olibi ham o'z fikrlarini bildirib o'tdi.

- Baxtiyor Azamovich barchasini to'g'ri va aniq tushuntirib berdi va o'ylaymanki boshqa gapga o'rin qolmadi. SHu kungacha “Neftchi”, “Olmaliq” va O'zbekiston olimpiya va milliy terma jamoasida faoliyat yuritdim. Tajribamdan kelib chiqib aytadigan bo'lsam, har bir kasb egasi o'z ishiga eng avvalo mehr bilan yondoshishi kerak. Kasbiga bo'lgan mehr qanchalik ko'p bo'lsa, ishda unum bo'ladi. Qandaydir savollar bo'lsa bemalol murojaat qilishinglar mumkin. Biz bunga doim tayyormiz.

“Andijon” FK ijrochi direktori Sanjarbek Yakubbekov ham so'z olib, o'z fikrlarini bildirib o'tdi.

- Hurmatli murabbiylar bugungi uchrashuvni tashkil etishdan maqsad, “Andijon” jamoasi murabbiylar shtabida faoliyat yuritib kelayotgan mutaxassislar bilan hamkorlikni yo'lga qo'yishdir. Bu yil jamoada rahbariyat o'zgardi. Bolalar futboliga, umuman mahalliy futbolchilarga bo'lgan etiborni kuchaytirish uslubini tanlaganmiz. Maqsadimiz mahalliy yoshlarni etishtirib chiqarish. Viloyatda futbolga mustahkam poydevor qurish. Bu yo'lda sizlarning ko'magingiz muhimdir. Biz tomondan “Bolalar va o'smirlar futbol maktabi”ga qo'ldan kelganicha amaliy yordam berilmoqda. Nasib qilsa kelgusida ushbu mexnatlarimizni rohatini birgalikda ko'ramiz degan umiddaman. Bu borada sizlarga quch quvvat va omad tilayman.

Ochiq muloqot chog'ida murabbiylar o'zlarini qiziqtirgan savollar bilan mehmonlarga murojaat qilishdi. “Viloyat bolalar va o'smirlar futbol maktabi”ning etakchi mutaxassisi SHamshir Qo'ldashev bosh murabbiy Baxtiyor Ashurmatovdan ushbu maskanga kelib, mashg'ulotlar jarayonida bevosita ishtirok etib berishlarini so'radi.

- Albatta biz bu erga hali yana ko'p kelamiz degan umiddaman. Bekzod Karimov bilan maslahatlashgan xolda, biror-bir musobaqaning final yoki ochilish uchrashuvi, qandaydir tanlov kuniga belgilab, bu erga yana tashrif buyuramiz. Qolaversa murabbiylar shtabidagi mutaxassislarning tajribasidan ham foydalanish mumkin. Bu borada sizlarga Zohid Nurmatov, SHuhrat Maqsudov va darvozabonlar murabbiyi Hislat CHilmatov yaqindan yordam berishga tayyor.

“Bolalar va o'smirlar futbol maktabi”da joriy yildan buyon murabbiylik qilib kelayotgan sobiq futbolchi Islom Ahmedov ham Baxtiyor Ashurmatovga murojaat qilar ekan. Jumladan shunday dedi – Avvalgi yillarni bilmadim-ku, lekin bu yil “Andijon” futbol klubi rahbariyati tomonidan bizga bo'lgan etibor va g'amxo'rlik sezilarli darajada bo'lmoqda. Buning uchun minnatdorchilik bildiraman. Biz murabbiylikka endi-endi kirib kelmoqdamiz. Oldinda o'rganadigan ishlar ko'p. Bu borada sizlarning tajribalaring bizga zarur. Istardikki, “Andijon”ning mashg'ulot jarayonini chetdan bevosita kuzatib, ishlash uslubingizni o'rgansak.

-Bu erga keliboq maydonlar bilan tanishib chiqdim va menga yoqdi. Keyinchalik “Andijon”ning mashg'ulotini shu erda ham o'tkazishga xarakat qilamiz. SHunda siz murabbiylar ham mashg'ulot jarayoniga guvohi bo'lishingiz mumkin. Bundan tashqari xohlagan paytda tortinmasdan murojaat qilishinglarga ham qarshi emasman. Bitta yo'nalishni belgilab olishimiz kerak va bosqichma-bosqich mahalliy yoshlarni etishtirib chiqarish lozim. Ochig'ini aytganda, Andijonda so'nggi yillarda mahalliy futbolchilarning etishib chiqishi keskin ravishda pasayib ketgandek go'y. Juda qiyin vaziyatda jamoani qabul qilib oldik va endilikda ushbu jarayondan chiqib ketish uchun xarakat qilmoqdamiz. Andijonlik muxlislar juda talabchan. Agarda jamoa ketma-ket mag'lubiyatga uchrasa, bosh murabbiy istefoga chiqarilishi hech gap emas. Biz ham bu erda qancha ishlashimizni bilmaymiz. Lekin qancha vaqt faoliyat yuritsak ham samarali ishlab, o'zimizdan yaxshi nom qoldirishni istaymiz. Bizdan keyin keladigan murabbiyga ham tayyor ish jarayonini yaratib ketishimiz kerak.

“Bolalar va o'smirlar futbol maktabi”da faoliyat olib borayotgan murabbiylardan biri Ashurmatovga shunday savol berdi. – Iqtidorli futbolchilarni izlab topib, ularni tayyorlab borayotganimizda sal ko'zga tashlanib qolsa, tezda Toshkent klublarining akademiyasiga o'tish payiga tushib qolmoqda. Ularni o'zimizda olib qolish uchun nimalar qilsak maqsadga muvofiq bo'lardi?

- Yaxshi savol bo'ldi. Kecha bo'lib o'tgan yig'ilishda ham ushbu mavzu ko'tarilgandi. Bolalar bilan ishlash oson emas. O'z vaqtida men ham malum muddat “Bunyodkor” akademiyasida bolalarga murabbiylik qilganman. Bolalarga bu erda huddi ota-aka kabi bo'lish kerak. Ularga qanchalik mehr bersangiz, shunchalik o'zingizga yaxshi bo'ladi. Bor iqtidorini yuzaga chiqarishda uyalmaydi. Mashg'ulot jarayoninglarni qisqa bo'lsada kuzatdim. SHundan xulosa qilib aytamanki, bolalar mashg'ulotda zerikib qolmasligi kerak. Mashg'ulotdan oldin murabbiy qo'l ostidagi bolalar hisobidan kelib chiqib, mashg'ulotda qanday mashqlar o'tkazilishi borasida aniq bir to'xtamga kelib, kerak bo'lsa qog'ozga koncpekt tariqasida yozib olishi kerak. Mashg'ulot paytida bolakaylar ko'proq to'p bilan shug'ullansa o'zlari uchun shuncha yaxshi bo'ladi. Ular mashg'ulot paytida to'xtab qolishi kerak emas. Imkon qadar har bir mashq to'p bilan bo'lmog'i lozim. SHunda ularda ham futbolga bo'lgan mehr ortib boradi. Qo'l ostingizdagi bolalarni o'zingizda saqlab qolish uchun ularga huddi ota va akadek bo'lishingiz kerak.Iloji bo'lsa rahbariyat tomonidan ularga bo'lgan etiborni kuchaytirish kerak. Ularni bir xil qilib sport kiyimlari va sport anjomlari bilan taminlash muhim. Futbolchilarning ota-onasi bilan muloqotda bo'lsangiz, ularga “Andijon” jamoasi va viloyat futbolini yuksaltirishda foydasi tegishi mumkinligini tushuntirib o'tsangiz, yosh bolalarda ham “Andijon” jamoasiga nisbatan mehr paydo bo'ladi va ular shu erda o'ynash uchun xarakat qiladi. Bizning jamoada o'zini ko'rsatgudek bo'lsa, keyinchalik taniqli klublarga o'zimiz transfer qilamiz. Yana bir gap. Futbol maktabida iqtidorli bolalarni ushlab qolish uchun o'ziga xos shartnomalarni joriy etish kerak. Agarda biror bir talantli futbolchingiz boshqa jamoaga o'tib ketmoqchi bo'lsa, marhamat qilib, futbol maktabiga malum bir miqdorda mablag' o'tkazib bersin yoki sport kiyimlari bilan taminlasin. Menimcha shunda to'g'ri bo'ladi. CHunki hozir shunday xolatki, yosh bolalar xohlagan jamoasiga o'tib ketmoqda. Unga mehr bergan murabbiy etiborsiz qolib ketmoqda. Murabbiy va futbol maktabi ham mexnatiga yarasha munosib rag'batlantirilishi lozim.

Savol-javoblar yakuniga etgach, “Bolalar va o'smirlar futbol maktabi”ning trenajyor zali va umuman maskan bilan tanishib chiqildi. Qariyib ikki soat davom etgan uchrashuv har ikki tomon uchun qiziq va foydali o'tdi deyish mumkin. Bu kabi uchrashuvlar viloyatdagi boshqa futbol maktablari bilan ham bo'lishi murabbiylar shtabining rejasidan o'rin olganini aytish lozim.