"Lokomotiv" futbol klubining TTYMI stadioniga kiraverishda ro'y bergan muammolar bo'yicha bayonoti

O'yinga bo'lgan etibor yuqoriligi bois stadionga ko'p sonli muxlislar kelishi kutilgandi va shunday bo'ldi ham. 

Xabaringiz bo'lsa kerak, mazkur uchrashuv qaysi stadionda bo'lib o'tishi to'g'risida birdaniga bir qarorga kelinmadi. Dastlab o'yin TTZdagi "Lokomotiv" stadionida bo'lishi haqida xabar berdik, biroq keyinchalik joy nomi o'zgarib, oxir-oqibat TTYMI varianti qoldi. Ushbu stadion institut hududida joylashgani bois xavfsizlikni taminlash maqsadida Ichki ishlar vazirligi tomonidan o'yinga atab chipta chiqarish va chiptalar soni 2000 (ikki ming) donadan oshmasligi "Lokomotiv" futbol klubiga vazifa etib yuklatildi. 

Natijada klub shunga monand ish yuritib ikki ming dona chipta sotuvga chiqarib, chiptalar narxi CIP o'rindiqlar uchun 15 ming so'm, boshqa sektorlar uchun 5 ming so'm etib belgilandi. Ammo o'yin paytida shunday hol yuz berdiki, aksariyat muxlislar hatto chipta sotib olgan bo'lishlariga qaramay, stadionga kira olishmadi. Buning sababi shundaki, bazi ishqibozlar yo'lini topib bepul stadionga kirib ketishdi. 

Kimlardir stadion atrofidagi to'siqlardan oshib kirgan bo'lsa, yana kimlardir bamaylixotir miliciya xodimlari yonidan o'tib ketishdi. Va ayrim miliciya xodimlari o'z vazifalarini bajarish o'rniga bunga beparvolarcha qarab turishdi. Stadionda joylar soni cheklangan emasmi, buning oqibatida qo'lida chipta bo'la turib stadionga kira olmay qolganlar bilan tushunmovchilik yuzaga keldi. Va shu tariqa hatto chiptasi borlar ham stadionga kira olishmadi. Hatto klubimiz rahbariyati va bazi xodimlarimiz ham stadionga kirish borasida qiyinchilikka duch kelishdi. Qachonki "Biz shu o'yinda mezbonmiz, bizning jamoa o'ynaydi" deb yotig'i bilan tushuntirilganidan so'nggina miliciya xodimlari tomonidan kirishga ruxsat berildi. 

Muxlislarga shuni malum qilamizki, o'yin bo'ladigan kunlari xavfsizlikni taminlash maqsadida stadion to'liq Ichki ishlar vazirligi nazoratiga topshiriladi. Yani, bunda klubning chipta chiqarib sotishdan boshqa roli qolmaydi. Muxlislarning ichkariga kirishini esa to'liq miliciya xodimlari nazorat qiladi. Boshqacha aytganda, klub bu erda faqat o'yinning o'zi bilan bog'liq masalalarni hal etishi mumkin. "Lokomotiv" futbol klubi chipta sotib olgan bo'lishiga qaramay, stadionga kira olmay qolgan muxlislarning holatini tushunadi va keyingi o'yinlarda bunday voqea boshqa ro'y bermasligi uchun zarur chora-tadbirlarni o'rganib chiqadi. 

"Lokomotiv" futbol klubi matbuot xizmati.