Ravshan Haydarov Eron – Qirg'iziston uchrashuvini kuzatish uchun Tehronga jo'nab ketdi

O'zbekiston milliy terma jamoasining JCH-2018 3-saralash bosqichidagi raqibi – Eron milliy terma jamoasi rasmiy o'yinlarga tayyogarlik jarayonida 7 iyun kuni Tehronda Qirg'iziston milliy terma jamoasiga qarshi o'rtoqlik uchrashuvida maydonga tushadi. Takidlash joiz, milliy terma jamoa raqiblarining o'yinlari Samvel Babayan bosh murabbiyligidagi milliy terma jamoa murabbiylar shtabida katta qiziqish uyg'otgan. SHu bois, milliy terma jamoa katta murabbiyi Ravshan Haydarov Eron terma jamoasi ishtirokidagi o'yinni kuzatish va o'rganish uchun Eronga jo'nab ketdi.

Eslatib o'tamiz, Eron terma jamoasi o'tgan haftada Makedoniya terma jamoasiga qarshi o'rtoqlik uchrashuvida maydonga tushib 3:1 hisobida g'alaba qozongan edi. Qirg'izistonga qarshi uchrashuv Karlush Keyrush jamoasi uchun rasmiy o'yinlardan oldingi tayyorgarlik bosqichidan o'rin olgan navbatdagi uchrashuv hisoblanadi.

Malumot uchun, O'zbekiston milliy terma jamoasi ham rasmiy o'yinlarga tayyorgarlik jarayonini boshlagan. Ayni damda Samvel Babayan bosh murabbiyligidagi O'zbekiston milliy terma jamoasi saralash bosqichi o'yinlaridan oldingi ilk yig'inini o'tkazish uchun Avstriyaga jo'nab ketgan. Avstriyada milliy terma jamoa 7 iyun kuni Kanada terma jamoasiga qarshi o'rtoqlik uchrashuvida maydonga tushadi.