"Uz-Dong-Ju"ni 9:0 hisobida mag'lub etgan "Lokomotiv" etiborini "Buxoro"ga qaratadi

Andijonning "Uz-Dong-Ju" klubi bilan kechgan bahsda "temiryo'lchilar" o'ta yirik 9:0 hisobida g'alaba qozonishdi va chorak finalga yo'l olishdi.

Esingizda bo'lsa, birinchi o'yinda "Loko" 4:1 hisobidagi g'alaba bilan safardan qaytgandi. Javob bellashuvida ham "temiryo'lchilar" raqibga hech qanday imkoniyat qoldirishmadi. Mazkur uchrashuvda Ivan Nagaev uchta to'p kiritgan bo'lsa, Quvondiq Ro'ziev, Doniyor Usmonov, Ikrom Aliboev, Sardor Mirzaev, Timur Kapadze hamda Temurxo'ja Abduxoliqov o'z hisoblariga bittadan gol yozib qo'yishdi.

Endi "Lokomotiv" O'zbekiston Kubogining chorak finalida "Mashal"ga qarshi bahs olib boradi. Bunda birinchi o'yinlar 5-6 iyulga, javob bellashuvlari esa 8-9 iyulga belgilangan. "Loko" "Mashal" bilan kechadigan dastlabki uchrashuvni safarda o'tkazadi.

11 iyun kuni esa "Lokomotiv"ni yana bir muhim uchrashuv kutib turibdi. SHu kuni "temiryo'lchilar" o'z maydonlarida "Buxoro"ni qabul qilishadi. Oliy liga turnir jadvalida "Lokomotiv" 28 ochko bilan birinchi, "Buxoro" esa 18 ochko bilan 6-o'rinda bormoqda. Oliy liganing 11-turidan o'rin olgan "Lokomotiv" - "Buxoro" bahsi ham TTYMI stadionida bo'lib o'tadi va o'yin 19:00da boshlanadi.