"Andijon": "Metallurg"ga qarshi o'yin oldidan tarkibda jiddiy yo'qotishlar bor

Bo'lajak uchrashuvga “burgutlar” har tomonlama puxta tayyorgarlik ko'rishga xarakat qildi. Mazkur bahsga tayyorgarlikning so'nggi bosqichi Toshkentdagi “Geofizika” qarorgohida olib borildi. Bosh murabbiy Baxtiyor Ashurmatov malum muddat kerakli muolajalarni olgach, klubga qaytdi. Mashg'ulotlar Baxtiyor Azamovichning boshchiligida o'tkazildi.

O'tgan turda “SHo'rtan”dan uchralgan mag'lubiyatdan so'ng futbolchilar “Metallurg”ga qarshi kechadigan bahsda imkon qadar ochko olishga bor kuchlarini berib xarakat qilishi tabiiy.

Ammo tarkibda bir qator yo'qotishlar mavjud. Xususan Ibrohim Otaxonovning sariq kartochkalari soni 4taga etgani sababli bugungi o'yinni o'tkazib yuboradi.

Nemanya Yovanovich esa yurtiga jo'nab ketgandi. Uning xujjatlarida muammo yuzaga kelgani bois serbiyalik hujumchining ortga qaytishi biroz kechikdi.

Himoyachi Javlon Guseynov jaroxat sabab bir oy muddatga safdan chiqqan. Iqbol Boboxonov ham jaroxatdan so'ng asta-sekin tiklanish jarayonida va u bo'lajak bahsga tayyor emas.

Yarim himoyachi Otabek Valijonovda ham jaroxat bilan bog'liq muammo borligi sabab “Metallurg”ga qarshi bahsni o'tkazib yuboradi.

SHuningdek Alisher SHog'ulomov va Abdumalik Abdullaev ham ayrim sabablarga ko'ra ayni damda jamoa ixtiyorida emas.