“Metallurg”: “Bunyodkor”ga qarshi o'yinga tayyorgarlik boshlandi

Jamoa bu yilgi mavsum peshqadamlaridan biri – “Bunyodkor”ga qarshi o'yinga tayyorgarlik boshlab yubordi.  SHu o'rinda aytib o'tish kerak, o'zaro uchrashuvlar statistikasiga nazar tashlaydigan bo'lsak, “Bunyodkor” madanchilarning eng noqulay raqibi ekanligini bilib olamiz. Bugungacha qaldirg'ochlar o'zaro o'tkazilgan 18 ta o'yinning 16 tasini o'z foydalariga hal etganligi fikrimiz isbotidir. Bekobodliklar faqat 2 uchrashuvda “Bunyodkor”ni taslim eta olgan. Kiritilgan va o'tkazib yuborilgan gollar nisbati 42:16, qoldirg'ochlar foydasiga.

2016 yilgi mavsumni har ikkala jamoa muvaffaqiyatli o'tkazib kelmoqda. Bu esa Bekoboddagi o'yin murosasiz va shiddatli kurashlar ostida o'tishidan darak beradi. Turning markaziy o'yinlaridan biri bo'lgan mazkur uchrashuvni toshkentlik tajribali hakamlardan biri Viktor Serazetdinov boshqarib boradigan bo'ldi. Unga qanotlarda navoiylik Obid Jumaev hamda toshkentlik Timur Gaynulinlar yordam berishadi. Zahiradagi hakam esa buxorolik Elyor Tursunov.

Uchrashuv nazoratchi hakami Elbek Musaev, O'zbekiston professional futbol ligasidan vakil sifatida esa Aleksey Frolov Bekobodga tashrif buyuradi.


Metallurg (Bekobod) – Bunyodkor (Toshkent)
Hakamlar: V. Serazetdinov (Toshkent), O. Jumaev (Navoiy), T. Gaynulin (Toshkent), E. Tursunov (Buxoro)
Nazoratchi: E. Musaev (Samarqand).
O'zPFL vakili: A. Frolov.

"Metallurg" matbuot xizmati