Diyor Turopov: “Maydon markazidan gol urish, shunchaki ajoyib”

Turopov ushbu o'yinda jamoasining ikkinchi golini urishga muvaffaq bo'ldi.

“Andijon” bilan o'yinda oson bo'lmasligini bilgandik. CHunki hech bir jamoa o'z uyida, o'z muxlislari oldida ochko yo'qotgisi kelmaydi. Biz esa o'tgan turda “SHo'rtan” bilan uchrashuvda yutishga haqli edik. Biroq omad kelmagandi, yutqazganimizdan keyin “Andijon”dan ochko olishimiz shart edi. Musoboqa jadvalida qiyin holatga tushishimizga hammamiz bilardik. SHu bois ham bor  kuchimizni berib harakat qildik.

Golimga keladigan bo'lsak “Andijon” oxirgi daqiqalarda bor kuchini berib harakat qildi va butun jamoa bo'lib hujumga o'tdi. Ularning darvozoboni ham kelgan edi, o'sha vaziyatda to'pni sheriklarim menga oshirib yuborishdi. SHerigim Ro'zimboy Ahmedov darvoza bo'shligini aytdi, tavakkal maydon yarmiga etmay turib darvozaga zarba berdim. To'p darvozaga aniq bordi va gol bo'ldi. Maydon markazidan gol urish, shunchaki ajoyib. Menimcha faoliyatimda boshqa bunday gol bo'lmasa ham kerak, - deydi Turopov.