“Metallurg”: Vodiy safariga tayyorgarlik boshlandi

Bu o'yin 21 iyun kuni bo'lib o'tadi. “Bunyodkor” jamoasiga qarshi kechgan qiyin uchrashuvdan keyin bekobodliklarga bir kunlik dam berildi va uik-enddan etiboran navbatdagi turga hozirlik jarayoni boshlandi. O'z navbatida shanba kuni poytaxtimizdagi JAR stadionida O'zbekiston U-19 jamoasi bilan nazorat uchrashuvi ham bekobodliklarning “Navbahor”ga qarshi o'yiniga tayyorgarlik vazifasini o'tab berdi.

“Metallurg” dushanba kuni Namangan sari yo'lga chiqadi. O'tgan mavsum bekobodliklar Namanganda mezbonlar bilan jangovor durangga imzo chekishgandi. Birinchi davrada 2-turda kechgan mazkur uchrashuvda hisobni mehmonlar vakili Alisher Ziyovuddinov ochgandi. Ammo birinchi bo'limning o'zidayoq maydon egalari Azim Ahmedov va Dilshod Jabborovning gollari evaziga oldinga chiqib olishgandi. “Navbahor” mazkur uchrashuvda g'alaba “cho'ntakda” deb turgan paytda mehmonlar so'nggi hujumda penalti ishlashgan. 11 metrlik nuqtadan jarima zarbasini Dilmurod Karimov aniq amalga oshirib, durangni rasmiylashtirgandi – 2:2.

Bu yil Namanganda bo'lib o'tadigan o'yinni andijonlik hakamlar brigadasi boshqarib boradi. Bosh hakam Temur To'xtasinovga qanotlarda Anvar Marajabov hamda Ziyodullo Abdurahmonovlar yordam berishadi. Zahiradagi hakam gulistonlik Baxtiyor Yulcharaev.

SHu o'rinda o'tgan mavsum Temur To'xtasinov “Metallurg” ishtirokidagi uchta uchrashuvda ishlaganligini aytib o'tish lozim. Bekobodliklar safarda “Navbahor” bilan durang o'ynagan, “Qo'qon 1912” jamoasiga imkoniyatni boy berib qo'ygan va Samarqandning “Dinamo” jamoasini o'z uyida mag'lubiyatga uchratgan. Bu yilgi mavsumda esa andijonlik hakamlar “Metallurg” ishtirokidagi o'yinga birinchi marta tayinlandi.

Navbahor (Namangan) – Metallurg (Bekobad)
Hakamlar: T. To'xtasinov (Andijon), A. Marajabov (Andijon), Z. Abdurahmonov (Andijon), B. Yulcharaev (Guliston)
Nazoratchi: S. Ermatov (Toshkent).
O'zPFL vakili: B. Mametov.