Suhrob Sultonov: "Yigitlardagi fidoyilik menga qanot bag'ishladi"

- O'yinning og'ir kechishini murabbiylarimiz qayta-qayta takidlagandi. Biz shu kungacha Namangandan g'alaba bilan qaytmagandik. Bu safar ushbu ko'ngilsiz holatga barham berishni dilimizga tuggandik, niyatimiz xolis ekan, g'alaba qozondik. Uchrashuv haqiqatan ham juda qiyin kechdi. Mezbonlarning dastlabki daqiqalardan katta kuch bilan oldinga tashlanishini jamoadoshlarim fidoyilik bilan qaytarayotganligi menga qanot bag'ishladi. Xayrulla Karimovning chamasi 5-6 metrlardan bergan kuchli zarbasini to'sib qolganimdan keyin shu kuni g'alaba qozonishimizga ishonchim ortdi. O'sha hujum chog'ida dastavval darvozaning yuqori burchagiga kirib ketayotgan to'pni Dilmurod Karimov boshi bilan qaytarib qoldi. Keyin namanganliklar sardori Xayrulla aka kuchli zarba berdi. Tavakkaliga to'pga tashlandim. Yo'nalishni topa olganim meni ruhlantirib yubordi. Ikkinchi taymning so'nggida mezbonlar bosimni rosa oshirishdi. Ayniqsa olis masofadan berilgan zarbalar juda xavfli chiqdi. Omadim bor ekan, darvozamni goldan saqlab qoldim.

- “Navbahor”ning bo'ychan hujumchisi Oleksandr Pishur maydonga chiqarilgach ikkinchi qavatda bahs olib borish og'ir bo'ldi. Lekin vaziyatlardan chiqib ketdik. Pishur yonimga kelib “odammisan yoki robot” deb hazillashdi. Bu ham o'yinimga berilgan baho deb o'ylayman. “Paxtakor”, “Qizilqum” jamoalari bilan uchrashuvlarda oxirgi daqiqalarda gol o'tkazib yuborgandik. Bu gal hammasi rejamizdagidek chiqdi. Buning uchun barcha murabbiylarimizdan va albatta darvozabonlar bo'yicha murabbiyimiz Alisher Ahmedovdan minnatdorman.

- Oldinda yana ikkita qiyin o'yin bizni kutib turibdi. CHempionat peshqadami – “Lokomotiv” va safar uchrashuvida – “Neftchi” bilan. Yaxshi niyat deyishadi-ku. Nasib bo'lsa, bu o'yinlarda ham muxlislarimiz ishonchini oqlashga harakat qilamiz, deydi Suhrob Sultonov.

"Metallurg" matbuot xizmati