Mustafo Bayramov: “Himoyadagi xatolarimiz qimmatga tushdi”

- O'yinni yomon boshlamagandi. Keyinchalik esa ishlarimiz yurishmadi. Aslini olganda yigitlar uchrashuvda faqat g'alaba qozonishni niyat qilishgandi. Har bir o'yindagi shiorimiz faqat yutuq uchun maydonga tushish sanaladi. Bugungi kunda “Bunyodkor” chempionatimizning etakchi jamoalaridan biri sanaladi. SHunga qaramay raqibga munosib tarzda qarshilik ko'rsatishga intildik. Lekin, yakunda ijobiy natijani qo'lga kirita olmadik. Bugungi uchrashuvda jarohat va diskvalifikaciya tufayli ikki nafar qanot himoyachilarimiz Obid Jo'raboev hamda Tohir SHamsiddinovning xizmatlaridan foydalana olmadik. Aynan shu yo'qotishlar ham o'yinda bizni zararimizga ishladi.

Himoyada yo'l qo'ygan xatolarimiz qimmatga tushdi. Misol uchun hisob 1:1 bo'lib turgan vaziyatda chap qanot himoyachimizning xatosi natijani o'zgarishiga olib keldi. Yigitlar bugun qo'llaridan kelganicha ijobiy natija uchun intilishdi. SHu sababli ularga ortiqcha etirozlar yo'q. “Bunyodkor” kuchli raqib bo'lishiga qaramay raqib darvozasi oldida xavfli vaziyatlarni sodir eta oldik. Pishur ikki bor, Rahmatullaev qulay imkoniyatlardan foydalana olishmadi. Xatolar ustida ishlab, birinchi davraning so'nggi uchrashuvida g'alaba uchun maydonga tushamiz, - deydi Bayramov.

"Navbahor" matbuot xizmati