"UzReport" telekanali xodimi Parijda!

O'zbekiston hududida ushbu musobaqani namoyish etish huquqini qo'lga kiritgan "UzReport" telekanali EVRO-2016ning ortda qolgan barcha o'yinlarini namoyish etdi. Ertangi final uchrashuvi munosabati bilan telekanal xodimi Yoqubjon Bobojonov Franciya poytaxti Parij shahriga jo'nab ketdi.

Hamkasbimiz ertaga finaldan oldin Sen-Denidagi "Stad De Frans" stadionidan turib O'zbekiston bilan aloqaga chiqishni rejalashtirmoqda. Demak final uchrashuvi bo'lib o'tadigan stadiondagi muhitini yurtdoshlarimiz "UzReport" telekanali orqali his etishlari mumkin bo'ladi.

"Stad de Frans" stadioni

"Bugun Parij shahriga etib keldik. Katta futbol bayramiga tayyorgarlik ajoyib tarzda davom etmoqda. Final uchrashuvi bo'ladigan "Stad De Frans" stadioniga borib tegishli akkreditaciyani oldik. O'yingohda ham tayyorgarliklar avijda. Butun Franciya xalqi milliy terma jamoadan g'alaba kutmoqda. Bundan tashqari ko'chalarda Portugaliya terma jamoasi muxlislarini ham uchratish mumkin. Parijda mehmonlar soni soat sayin ko'payib bormoqda. Dunyoning turli burchaklaridan kelgan muxlislar bilan gaplashdik. Ko'pchilik ikala jamoaning imkoniyatini teng baholashmoqda.

Finalga mutaxassislar orasida ham qiziqish tabiiyki katta. Biz joylashgan mehmonxonada italiyalik dunyoga mashhur murabbiy Fabio Kapello hamda rossiyalik sobiq futbolchi Valeriy Karpin istiqomat qilmoqda. Ular tegishli telekanallar bilan shartnoma tuzishgan va ertangi final vaqtida ushbu telekanallarga ishlashadi.

Mashhur Fabio Kapello bilan

"UzReport" telekanali professional tarzda ishlashni joriy etishni o'z oldiga maqsad qilib qo'ygan. SHu bois katta musobaqalar finallariga xodimlar yuborish yo'lga qo'yildi. Evropa chempionlar ligasi finalida telekanalimiz vakili Aziz Qudratov ishtirok etdi. Evropa chempionati finali bo'ladigan stadionga ega kamina tashrif buyurdi. Eng asosiy maqsadimiz ertangi katta o'yin muhitini voqea joyidan turib O'zbekiston xalqiga etkazish", - deydi "UzReport"  telekanali "Sport" tahririyati bosh muharriri Yoqubjon Bobojonov.

"Eyfel" minorasi atrofida odamlar gavjum