Dastlabki davraning 11 kashfiyoti

Avgust oyiga qadar futbolchilar biroz xordiq chiqarishadi va ikkinchi davraga tayyorgarlik olib borishadi. Bugun birinchi davrada o'zini ko'rsata olgan yosh futbolchilar haqida gaplashamiz. O'tgan mavsumlarda oliy ligada o'ynamagan yoki o'ynagan bo'lsa ham juda kam uchrashuvlarda ishtirok etgan ko'plab futbolchilar aynan bu yil asosiy o'yinchiga aylanib olishdi. Quyida dastlabki davrada o'z o'yinlari bilan muxlislar mehrini qozongan va kashfiyotga aylangan 11 nafar futbolchi haqida so'z yuritamiz.

Kashfiyot: Muhammad Isaev (#17)
Klubi: "Olmaliq"
Tug'ilgan sanasi: 01.09.1994
Ampluasi: Yarim himoyachi
2016 yilgi natijasi: 12 o'yin 779 daqiqa 1 gol
2015 yilgi natijasi: 2 o'yin 31 daqiqa

Igor SHkvirinning yana bir topilmalaridan biri deb Muhammad Isaevni aytish mumkin. "Olmaliq" markaziy yarim himoyachisi o'tgan yil atiga 2ta o'yinda zaxiradan maydonga tushgan edi. Bu mavsumda esa Isaev jamoaning asosiy futbolchisiga aylanib ulgurdi. "Olmaliq" yarim himoyasidagi juda katta raqobatga qaramay yosh futbolchi o'zini yo'qotib qo'ymayapti va o'sishda davom etmoqda. Agar shu ruhda davom etsa yaqin orada "Olmaliq"ning haqiqiy etakchisiga aylana oladi. Birinchi davraning eng so'nggi uchrashuvida "Qo'qon-1912" bilan o'yinda Muhammad oliy ligadagi o'zining debyut golini urishga muvaffaq bo'ldi.

Kashfiyot: Islom Rashidxonov
Klubi: "Nasaf"
Tug'ilgan sanasi: 22.10.1997
Ampluasi: Yarim himoyachi
2016 yilgi natijasi: 9 o'yin 407 daqiqa 2 gol
2015 yilgi natijasi: 0 o'yin

Ro'ziqul Berdievning yana bir topilmalaridan biri. Islom Rashidxonov bu mavsum oliy ligada debyutini nishonladi. Hujumkor yarim himoyachi “Qizilqum” bilan bahsda debyut golini urdi. “So'g'diyona” bilan uchrashuvda ham raqib darvozasiga to'p kiritdi. Rashidxonov birinchi davrada oliy ligada gol urgan eng yosh futbolchi deb qayd etildi.  Ikkinchi davrada “Nasaf”da katta o'zgarishlar kutilmoqda. Bu degani yosh futbolchilarga yanada ko'proq imkoniyat beriladi. Bundan Rashidxonov kabi futbolchilar unumli foydalanishlari kerak bo'ladi. Kelajakda Gevorkyanning o'rnini bosishi uchun Islom Rashidxonov hali ancha ko'p mehnat qilishi lozim bo'ladi.

Kashfiyot: Xurshid G'iyosov
Klubi: "Obod"
Tug'ilgan sanasi: 12.04.1995
Ampluasi: Himoyachi
2016 yilgi natijasi: 14 o'yin 1260 daqiqa
2015 yilgi natijasi: 0 o'yin

Oliy liga debyutanti safida yorqin o'yin namoyish etgan futbolchilardan biri himoyachi Xurshid G'iyosov bo'ldi. “Bunyodkor”ga tegishli bo'lgan yana bir futbolchi “Obod”da ijarada o'ynamoqda. U ham o'tgan yil Yangi Zelandiyadagi yoshlar o'rtasidagi mundialda ishtirok etib kelgan. Murabbiylar Xurshid G'iyosovga qo'rqmay ishonch bilirishdi. Futbolchi esa ishonchni oqlashga harakat qilmoqda.

Kashfiyot: Farhod Bekmurotov
Klubi: "Andijon"
Tug'ilgan sanasi: 08.10.1994
Ampluasi: Yarim himoyachi
2016 yilgi natijasi: 13 o'yin 1046 daqiqa
2015 yilgi natijasi: 5 o'yin 228 daqiqa 1 gol

O'tgan mavsum oxirida "burgutlar" safida ko'rinish bergan Farhod Bekmurotov bu yil jamoaning asosiy tarkibi futbolchisiga aylandi. Bosh murabbiy Baxtiyor Ashurmatov qo'rqmay yosh futbolchiga ishonch bildirdi. Bekmurotov esa kuchli klublarga qarshi bahslarda ham o'zini yo'qotib qo'ygani yo'q. Atrofida tajribali futbolchilar o'ynagani uchun Bekmurotov birinchi davrada bir tekisda o'ynay oldi. Kamchiligi sifatida uning ko'p sariq kartochka olishini aytish mumkin. Dastlabki davrada 13ta o'yinda jami 5 marta ogohlantirilgan futbolchi jamoada bu borada Otaxonovdan keyingi o'rinni band etdi.

Kashfiyot: Doston Tursunov (#20)
Klubi: "Qo'qon-1912"
Tug'ilgan sanasi: 13.06.1995
Ampluasi: Himoyachi
2016 yilgi natijasi: 14 o'yin 1216 daqiqa
2015 yilgi natijasi: 2 o'yin 94 daqiqa

O'tgan yil Yangi Zelandiyada bo'lib o'tgan yoshlar o'rtasidagi Jahon chempionatida ishtirok etib qaytgan himoyachi "Neftchi" safida atiga 2ta o'yinda ishtirok etgandi xolos. Doston Tursunov bu yil "Qo'qon-1912"ga ko'chib o'tib juda to'g'ri qilganini uning statistikasi ham ko'rsatib turibdi:  14ta o'yin 1216 daqiqa. Tursunov faqat "Navbahor" bilan o'yinda ishtirok etmadi. O'sha o'yinda qo'qonliklar yirik hisobda (1:5) yutqazib qo'yishgandi. Bundan tashqari, Doston Qarshida "Nasaf" bilan o'yinda ikkinchi bo'limda maydonga tushdi. Qolgan barcha o'yinlarda to'liq harakat qilgan himoyachi atiga 2 marta sariq kartochka olgani tahsinga sazovor natija. Tursunov oliy ligadagi o'yinlari orqali milliy terma jamoa murabbiylari etiboriga ham tushgani haqida xabarlar chiqdi. Demak katta ehtimol bilan himoyachini milliy terma jamoada ko'rib qolsak ajab emas.

Kashfiyot: Muzaffar Abdullaev
Klubi: "So'g'diyona"
Tug'ilgan sanasi: 26.01.1992
Ampluasi: Darvozabon
2016 yilgi natijasi: 6 o'yin 540 daqiqa -5 gol
2015 yilgi natijasi: 0 o'yin

Jizzaxning “So'g'diyona” klubi ustozi Davron Fayziev har yili yosh futbolchilarni kashf qilishni odat qilgan. Bu mavsumda yosh darvozabon Muzaffar Abdullaev jamoaning asosiy tarkibiga yashin misol kirib keldi. 9-turga kelib oliy ligada debyut qilgan Muzaffar “Olmaliq” bilan bahsda ajoyib o'ynadi va o'z darvozasi dahlsizligini saqlab qoldi. SHundan keyin Abdullaev Fayziev uchun asosiy posbonga aylandi. 6ta o'yinda maydonga tushib o'z darvozasidan 5ta to'p olib chiqqan va 2ta uchrashuvda to'p o'tkazmagan Muzaffar haqli ravishda birinchi davraning kashfiyotlaridan biri bo'ldi. Agar ikkinchi davrada oliy liga grandlari bilan bahslarida ham o'zini ko'rsatsa 2016 yilgi mavsum kashfiyotlaridan biriga aylanishi ham mumkin.

Kashfiyot: Bobur Abduxoliqov
Klubi: "Nasaf"
Tug'ilgan sanasi: 23.04.1997
Ampluasi: Hujumchi
2016 yilgi natijasi: 13 o'yin 942 daqiqa 2 gol
2015 yilgi natijasi: 1 o'yin 7 daqiqa

“Pele” laqabli hujumchi o'tgan yil oliy ligada faqat bitta o'yinda maydonga tushib 7 daqiqagina harakat qilgandi. Ro'ziqul Berdiev bu mavsumda yosh Bobur Abduxoliqovga ko'proq ishonch bildirishni boshladi. O'zbekiston yoshlar terma jamoasi azosi mavsum boshida ajoyib o'yin ko'rsatgandi. Osiyo chempionlar ligasidagi debyut uchrashuvida o'zini yo'qotib qo'ymagan hujumchi Saudiya Arabistonida “Al Ahli” darvozasiga gol urishga erishdi. Keyingi turda Qarshida xuddi shu jamoa darvozasini ishg'ol qilgandi. Oliy ligada dastlabki davrada “Paxtakor” va “Neftchi” bilan o'yinlarda to'p kiritishga muvaffaq bo'ldi. Boburning tezligi juda yaxshi, lekin biroz tajriba va barqarorlik etishmayapti. Bu narsalar albatta yillar davomida futbolchida paydo bo'lishini barchamiz bilamiz.

Kashfiyot: Sardor Azimov
Klubi: "Navbahor"
Tug'ilgan sanasi: 11.06.1995
Ampluasi: Yarim himoyachi
2016 yilgi natijasi: 13 o'yin 968 daqiqa
2015 yilgi natijasi: 0 o'yin

Bu yil oliy ligada debyutini o'tkazayotgan Sardor birinchi davrada chap qanot yarim himoyachisi sifatida o'ynadi. O'yinlar vaqtida bazan Anvar Rajabov bilan qanot almashib, o'ng qanotda ham faol harakat qila oldi. 21 yoshli yarim himoyachi yaxshi texnikaga ega. Qolaversa to'p oshirishlari xavfli ko'rinish oladi. Azimov dastlabki davrada 3 marta sheriklarining gollariga assistenlik qildi. Kamchiligi sifatida unga biroz barqarorlik etishmayotganini aytish mumkin. Dastlabki davrada ko'pgina o'yinlarda yorqin o'yin namoyish qilgan futbolchi bazi uchrashuvlarda o'zidan kutilgan o'yinni ko'rsata olgani yo'q. Eng asosiysi o'yinlarda maydonda bor kuchi bilan harakat qiladi. Sardorda o'zini ijobiy tarafdan ko'rsatish va jamoa muvaffaqiyati o'z xissasini qo'shish istagi yuqori.

Kashfiyot: Javohir Ilyosov
Klubi: "Mashal"
Tug'ilgan sanasi: 06.02.1994
Ampluasi: Darvozabon
2016 yilgi natijasi: 10 o'yin 900 daqiqa -10 gol
2015 yilgi natijasi: 1 o'yin 90 daqiqa -1 gol

Javohir Ilyosov o'tgan mavsumning so'nggi turida "Lokomotiv" bilan o'yinda maydonga tushgandi va bitta gol o'tkazib yuborgandi. Sanjar Quvvatov "Mashal"ni tark etgach Ilyosov tajribali Botir Nosirov bilan raqobat qildi. Murabbiylar 10ta o'yinda yosh posbonga ishonch bildirishdi. 22 yoshli darvozabon uchun oliy ligada 10ta o'yinda 10ta gol o'tkazib yuborish yomon natija hisoblanmaydi. Ilyosovning reakciyasi joyida, "Obod" bilan bahsda u raqibning penaltidan yo'llagan zarbasidan so'ng to'pni qaytarib jamoasini goldan qutqarib qolganini ko'pchilik yodidan chiqarmagan bo'lishi aniq. Bir narsani ishonch bilan aytish mumkinki Quvvatovdan keyin "Mashal"da yana bir iqtidorli darvozabon etishib chiqmoqda.

Kashfiyot: Javohir Esonqulov (#13)
Klubi: "Metallurg"
Tug'ilgan sanasi: 20.04.1997
Ampluasi: Hujumchi
2016 yilgi natijasi: 15 o'yin 1051 daqiqa 3 gol
2015 yilgi natijasi: 0 o'yin

“Bunyodkor”ga tegishli bo'lgan yosh hujumchi bu mavsumni “Metallurg”da ijarada o'tkazmoqda. Etiborlisi oliy ligada debyut mavsumini o'tkazayotgan Javohir Esonqulov o'zidan yaxshi taassurot qoldirmoqda. 19 yoshli futbolchi birinchi davrada barcha 15ta o'yinda maydonga tushishga muvaffaq bo'ldi. Bekobod klubi murabbiylari ham unga ishonch bildirishmoqda. Esonqulov “Mashal”, “Qo'qon-1912” va “Qizilqum” bilan o'yinlarda raqib darvozasiga gol urishga erishdi. O'yinlar davomida gol urishdan tashqari sheriklariga ham golli uzatmalar berishni xush ko'ruvchi yosh hujumchi ishlashdan to'xtamasagina kelajakda yaxshi futbolchi bo'lib etishib chiqishi mumkin.

Kashfiyot: SHoxruz Norxonov
Klubi: "Obod"
Tug'ilgan sanasi: 13.04.1993
Ampluasi: Hujumchi
2016 yilgi natijasi: 15 o'yin 1284 daqiqa 7 gol
2015 yilgi natijasi: 0 o'yin

Birinchi davraning eng yorqin kashfiyoti sifatida “Obod” hujumchisi SHoxruz Norxonovni aytish mumkin. Ko'plab futbol mutaxassislari va futbol olami insonlari aynan shu fikrdalar. Bunga qadar faqat birinchi va ikkinchi ligada o'ynagan futbolchi bu yil oliy ligada ilk bor maydonga tushmoqda. Norxonov elitada o'zini yo'qotib qo'ymadi “Obod” dastlabki davrada 11ta gol urdi, shundan 7tasini aynan SHoxruz raqib darvozasiga yo'lladi. “O'zbek Neymari” deb atalayotgan hujumchining sermahsulligi beiz ketmasligi aniq edi. Sababi uning Samvel Babayan boshchiligidagi O'zbekiston milliy terma jamoasiga chaqiruv olgani haqida xabarlar chiqdi. Demak, mehnat qilinsa barcha cho'qqilarni zabt etish mumkin.



Narzulla Saydullaev